Por Europa Press / Redacción | A Coruña | 14/10/2022 | Actualizada ás 11:43
O Tribunal Supremo inadmitiu a trámite o recurso de casación pola baixada do prezo do bus no consistorio coruñés, tras un fallo do Tribunal Superior de Xustiza de Galicia (TSXG), agora firme, que cuestionaba o método seguido para levar a cabo esta medida.
Así o informa a Marea Atlántica, durante cuxo mandato se procedeu a unha rebaixa do prezo. Nun comunicado, lamenta a decisión do Tribunal Supremo e insta agora o goberno local a buscar outras vías para "manter as tarifas e remunicipalizar o servizo en 2024".
Sobre o fallo ditado no seu día polo TSXG, tras un recurso da Compañía de Tranvías por outro anterior que deu a razón ao consistorio, esta formación sostén que "non avala o beneficio excesivo e contrario ás normas da UE que recibe a Compañía de Tranvías".
"A sentenza tampouco lle recoñece á empresa o dereito a recibir indemnización", insiste no seu comunicado no que avanza que pedirá ao goberno local "que calquera pago á concesionaria sexa previamente autorizado pola Comisión Europea".
Por outra banda, lamenta que que o Tribunal Supremo "inadmita, sen entrar no fondo do asunto, o recurso de casación presentado polo Concello da Coruña" tras a sentenza do TSXG, que anulou o ano pasado o abaratamento das tarifas do bus urbano da Coruña en 2019.
"Acatamos a decisión, pero non podemos estar de acordo con ela, pois supón inhibirse á hora de defender o interese público fronte ao beneficio industrial excesivo da empresa concesionaria dun servizo público esencial como é o transporte público", incide.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.