Por E.P. | SANTIAGO DE COMPOSTELA | 18/10/2022 | Actualizada ás 18:58
O presidente da Deputación de Ourense, Manuel Baltar, reuniuse no Pazo Provincial un encontro de traballo coa nova alcaldesa de Cenlle, Rebeca Sotelo. Sotelo convértese na terceira alcaldesa do mandato desta localidade ourensá, tras a renuncia por cuestións "persoais" do seu antecesor, José Manuel Rodríguez, que seguirá como edil.
Baltar desexoulle "moitos éxitos" como rexedora e destacou que "ten a capacidade e a iniciativa para liderar este concello, deseñando novos proxectos dinamizadores para o territorio".
O presidente do goberno provincial tamén destacou o "bo traballo" realizado polo anterior alcalde, José Manuel Rodríguez, na "liña de progreso dun concello de gran potencial", e que ten e terá, garantiu, na Deputación "á súa mellor aliada" para seguir crecendo.
Manuel Baltar avanzou a Rebeca Sotelo a "máxima implicación da Deputación con Cenlle" para seguir reforzando as liñas de cooperación abertas entre ambas as entidades: "Como administración máis próxima ao territorio, cada alcalde ourensán sabe que pode contar connosco para traer novas propostas de colaboración, estudalos e sumar esforzos para levalos a cabo".
O presidente da Deputación e a alcaldesa de Cenlle estiveron acompañados nesta reunión de traballo por César Fernández, vicepresidente segundo do goberno provincial e responsable dos asuntos de cooperación cos concellos da comarca do Ribeiro.
Na reunión abordáronse os proxectos de colaboración solicitados polo Concello á Deputación e que contan co compromiso de posta en marcha do goberno provincial, como unhas obras de saneamento en Cenlle e a mellora da seguridade viaria na OU-0303. Ademais, a alcaldesa sumou o apoio do goberno provincial para actualizar o rueiro municipal e continuar a limpeza e mantemento do paseo fluvial do río Miño.
O presidente da Deputación tamén lle avanzou no encontro deste martes no Pazo Provincial o futuro apoio á renovación do campo de fútbol municipal. Ademais, o Concello de Cenlle solicitou un tractor de roza para a prevención de incendios forestais, apoiándose no convenio asinado pola Deputación coa Consellería de Medio Rural en materia de incendios.
Pola súa banda, Sotelo valorou a implicación da Deputación con Cenlle e destacou a súa "ilusión" e "compromiso absoluto" co benestar dos veciños. "Traballaremos día a día para seguir mellorando entre todos Cenlle", resolveu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.