Galicia duplica en 2022 as hectáreas queimadas nos últimos catro anos, con máis de 51.000 h arrasadas
O conselleiro insiste en responsabilizar á seca do desastre. Só a vaga de lumes de 2017, con 62.000 hectáreas queimadas, supera a superficie queimada nos lumes deste ano na última década.
Por Europa Press / Redacción | SANTIAGO DE COMPOSTELA | 08/11/2022 | Actualizada ás 17:55
Galicia contabiliza no que vai de ano máis de 51.000 hectáreas queimadas en incendios forestais das que case o 75% --38.000 hectáreas-- arderon durante o mes de xullo, no que se produciron cinco dos 13 grandes incendios (de máis de 500 hectáreas) de 2022. Isto supón case o dobre do que se queimou nos últimos catro anos xuntos.
Así, desde 2018 ata 2021 queimáronse en Galicia pouco máis de 28.000 hectaŕeas; en 2018 (2.618 ha), 2019, (6.845 ha), 2020 (14.791 ha) e 2021 (4.396 ha). A superrficie queimada este ano só foi superada polas 62.000 hectáreas que arderon en 2017, o peor ano na loita contra incendios da época Feijóo.
As cifras foron achegadas polo conselleiro do Medio Rural, José González, durante a súa comparecencia este martes no pleno do Parlamento de Galicia, onde fixo balance da tempada alta de risco de incendios, concluída a finais do mes de outubro.
Desde comezos de ano ata o 31 de outubro, a Administración autonómica tivo constancia de 1.609 incendios, dos cales, o 82% (1.313) quedaron en conato ao afectar a menos dunha hectárea. Dos 296 restantes, 76 lumes superaron as 20 hectáreas.
Ademais, durante este verán foi necesario activar en 23 ocasións a coñecida como 'situación 2' por risco das chamas a núcleos habitados, unha cifra que, como resaltou González, é moi superior á media da última década (seis veces ao ano).
Todo iso, como incidiu o conselleiro, nun verán marcado pola anomalía meteoroloxía, con temperaturas por encima do normal e nun contexto de seca, ao que hai que sumar as treboadas que no mes de xullo desataron parte dos incendios máis graves da tempada.
