Sete anos de internamento nun psiquiátrico para unha persoa con esquizofrenia paranoide que acoitelou o seu tío

Un mozo de Vilagarcía de Arousa (Pontevedra) aceptou unha condena de sete anos de internamento nun centro psiquiátrico por un intento de homicidio cometido contra o seu tío, ao que cravou unha navalla no pescozo.

O xuízo, sinalado para este martes na sección cuarta da Audiencia Provincial de Pontevedra, resolveuse mediante un acordo de conformidade en virtude do cal o acusado recoñeceu os feitos a cambio dunha rebaixa na petición de penas.

Fiscalía solicitaba inicialmente nove anos e medio de internamento por un delito leve de danos e outro de homicidio en grao de tentativa por uns feitos ocorridos en agosto de 2021, cando o agora condenado agrediu ao seu tío.

Despois de que as partes alcanzasen un acordo a condena rebaixouse en dous anos e medio. O acusado padece esquizofrenia paranoide e dependencia politóxica, unhas patoloxías que lle provocaron alteración das súas capacidades intelectivas e volitivas en relación co feitos obxecto deste procedemento, polo que concorre a eximente de alteración psíquica.

Desde o 23 de agosto de 2021 o acusado permanecía en situación de prisión provisional pero a partir de agora cumprirá a súa condena nun centro terapéutico. A sentenza é firme e contra ela non cabe recurso.