A TVG despedirá o 2022 cos presentadores Arturo Fernández, Noelia Rei e Paco Lodeiro
Por Europa Press / Redacción | SANTIAGO DE COMPOSTELA | 23/12/2022 | Actualizada ás 17:53
Os espectadores da Televisión de Galicia despedirán este 2022 acompañados dos presentadores Arturo Fernández, Noelia Rei e Paco Lodeiro, que retransmitirán as badaladas de fin de ano desde a Praza do Obradoiro.
Segundo informou a corporación nun comunicado, minutos antes da medianoite conectará con eles Xosé Ramón Gayoso desde a gala de Noitevella que ofrecerá a televisión pública.
Arturo Fernández estará durante este Nadal á fronte de varios programas especiais da TVG como 'Juan Pardo. O sucesor', 'O tren que me leva a ti' e 'A invasión da G', ademais de ser o copresentador da gala de fin de ano.
Pola súa banda, Noelia Rei chega aos fogares galegos cada día, de domingo a mércores, co programa 'Malicia Noticias', que conta a actualidade "dunha forma moi distinta". Ademais, este ano foi recoñecida nos Premios Circom Rexional 2022 co galardón ao Novo Talento en Pantalla.
Así mesmo, Paco Lodeiro presenta un dos programas de "máis éxito da Televisión de Galicia", o concurso 'Atrápame se podes', que estes días ofrecerá unha serie de edicións especiais de Nadal con famosos e mozos como concursantes.
Así, con eles, a TVG destacou que o 31 de decembro será unha noite na que "non faltarán os sorrisos e o bo humor" para acompañar aos espectadores coas doce uvas na entrada do ano novo 2023.
