Comesaña normaliza as dimisións no Sergas: "É algo habitual, pasou sempre e seguirá pasando"

O conselleiro de Sanidade, Julio García Comesañan, defendeu que o diálogo da Administración autonómica cos profesionais médicos "é permanente" e normalizou que se produciron renuncias de xefes de servizo nas últimas semanas, algo que cualificou de "habitual".

"Pasou sempre e seguirá pasando", aseverou o máximo responsable da área sanitaria do Goberno galego en resposta aos xornalistas antes de participar na mañá deste venres nos actos da Translación dos restos do Apóstolo, en Santiago.

Preguntado polas dimisións de xefes de servizo no Sergas, as últimas na área sanitaria de Ourense esta mesma semana, o conselleiro encadrou estas renuncias na normalidade dentro dun cargo de responsabilidade no que, di, hai que facer fronte a "tensións" e "situacións complexas".

"Podo entender que chegado un momento algún poida dar un paso ao carón e que veña outro", incidiu Comesaña, que remarcou que existe "un gran número" de xefes de servizo en todas as áreas sanitarias, aos que agradeceu "o esforzo adicional de porse á fronte dun grupo de traballo".

Así as cousas, ante estas dimisións e as críticas recibidas desde organizacións e sociedades cara á xestión da Xunta en materia sanitaria, o conselleiro defendeu que "non hai ningún tipo de ruptura" cos profesionais, cos que "o diálogo é permanente e importante".

Julio García Comesaña comparece no pleno / Xunta de Galicia / Europa Press