A Xunta convoca axudas ao audiovisual galego, na que se inclúen por primeria vez os videoxogos
Poderán solicitarse ata o próximo 13 de febreiro
Por E.P. | SANTIAGO DE COMPOSTELA | 12/01/2023 | Actualizada ás 18:06
A Xunta de Galicia puxo en marcha esta semana o seu programa de subvencións ao audiovisual galego de 2023 coa convocatoria do tres primeiras liñas de axudas, que suman un investimento de 775.000 euros para apoiar especificamente as fases de exhibición, difusión e internacionalización.
O Diario Oficial de Galicia (DOG) publica este xoves as bases das axudas para salas de cinema por importe de 500.000 euros e para a asistencia a foros de negocio especializados e eventos de cinema fóra de Galicia, dotadas con 50.000 euros. Este venres será a quenda dos festivais audiovisuais, con 225.000 euros.
A Consellería de Cultura, explican nun comunicado, ten previsto abrir nos próximos meses as convocatorias para produción e coprodución audiovisual, desenvolvemento de proxectos e impulso do talento, "de forma que o sector recibirá este ano máis de 3,7 millóns de euros en axudas para apoiar ás empresas en todas as fases do proceso audiovisual": desde a escritura do guión, preprodución do proxecto, rodaxe e posproducción ata a súa difusión, comercialización e exhibición.
Precisamente esta última etapa do proceso é obxecto das subvencións para salas de cinema publicadas este xoves a través das que a Xunta mantén o seu compromiso con este tipo de establecementos, "en recoñecemento ao seu papel fundamental para o conxunto do sector e fronte a un panorama marcado polos novos hábitos no consumo audiovisual", derivados do crecemento das plataformas dixitais, especialmente a partir da pandemia.
A convocatoria contempla 50.000 euros para proxectos desenvolvidos ata o próximo 15 de agosto por empresas galegas en relación coa programación de cinema galego e de películas europeas ou doutros países con baixa representación na cota de pantalla, así como con campañas de promoción e iniciativas para a atracción de públicos e o establecemento de prezos especiais para o público infantil, xuvenil e persoas maiores.
Convócanse en réxime de concorrencia non competitiva e xestiónanse con fondos europeos no marco do Hub Audiovisual da Xunta. As axudas poderán cubrir ata o 80% dos gastos subvencionables de cada proxecto, establecéndose unhas contías máximas en función do número de pantallas de cada espazo.
AXUDAS A FESTIVAIS
As axudas poderán solicitarse ata o próximo 13 de febreiro, de igual forma que as destinadas a festivais galegos do sector audiovisual, cuxa publicación se fará este venres no DOG.
A súa dotación é de 225.000 euros, o que implica un incremento de máis do 7% respecto de 2022, co que se mantén a tendencia á alza desde a creación en 2015 desta liña de subvencións, a través da que o ano pasado contribuíuse á organización de 11 certames considerados estratéxicos para o sector en Galicia.
Convocadas tamén en réxime de concorrencia competitiva, esta liña diríxese a persoas físicas, xurídicas e a entidades locais organizadoras de festivais que teñan lugar entre o 1 de novembro de 2022 e o 31 de outubro de 2023.
Entre os requisitos esixidos, establécese unha duración mínima de catro xornadas con, mínimo, 20 proxeccións, así como contar con tres edicións consecutivas nos anos inmediatamente anteriores. Ademais, a proposta de programación debe conter un 5% de títulos ou cinco sesións de produción cinematográfica e/ou dirección galegas.
AXUDAS A VIDEOXOGOS
Ademais, tamén este xoves publícanse as axudas para a comercialización e difusión exterior de proxectos e obras audiovisuais, nas que se inclúen por primeira vez os videoxogos. O Goberno galego contribúe á internacionalización das producións galegas cofinanciando con 50.000 euros tanto os custos da asistencia de empresas a mercados e feiras internacionais de referencia como a promoción de filmes galegos seleccionados nalgún dos máis destacados festivais do circuíto estatal e internacional.
No caso do sector dos videoxogos, subvencionarase a asistencia ao Gamescom de Colonia (Alemaña), Gamépolis de Málaga, IndiDevDay de Barcelona e Bigconference de Bilbao. A través desta vía, o ano pasado adxudicáronse preto de 35.000 euros a unha vintena de produtoras para a promoción dos seus traballos en mostras e encontros profesionais como a Berlinale, o Bafici de Buenos Aires, o festival de Nova York ou o Mipcom de Cannes.
