O OJD frea o optimismo da Voz e Faro
Hai unha semana os dous principais diarios en papel do país sacaban peito polos seus datos do EGM. Agora, a auditoría do OJD, máis precisa, revela que as súas vendas seguen a caer.
Por Galicia Confidencial | Santiago | 09/12/2014 | Actualizada ás 22:05
A nova vaga mensual de outubro da Oficina para la Justificación de la Difusión (OJD) non deixa lugar a dúbidas. A caída de vendas e difusión dos diarios en papel non está superada, malia os datos das enquisas do Estudios General de Medios no sentido contrario.
Cómpre ter en conta que o principal referente da industria editorial é o OJD, pois detalla a tirada, as vendas en quiosco e outros conceptos como subscricións, exemplares regalados en eventos, etc. Pola contra, o EGM baséase en entrevistas e, polo tanto, nun criterio máis feble, o 'recordo' do entrevistado de ter consultado un medio.
La Voz perde un 31% das vendas en tres anos
Así, La Voz de Galicia tiña unha difusión de 71.433 exemplares en outubro, o que supón unha caída do 10% respecto aos 79.353 de hai un ano. Esta caída porcentual é a maior entre os diarios rexionais.
La Voz declara a OJD unhas vendas de 33.452 exemplares, fronte aos 36.494 de hai un ano. Isto supón un retroceso do 8,3% en doce meses.
En 2011, por estas datas La Voz difundía 92.167 exemplares e vendía 48.643. Polo tanto, en tres anos a difusión caeu un 22% e as vendas un 31%.
Faro retrocede un 20% en difusión dende 2011
Faro de Vigo tamén cae, pero a cabeceira do Grupo Prensa Ibérica volve ser a que menos retrocede en difusión entre os principais diarios locais do Estado. En ventas no último ano perde un 1,9% (22.587 fronte 23.031) e en difusión un 2,8% (30.205 fronte a 31.078).
En 2011, por estas datas Faro difundía 37.875 exemplares, polo que a difusión en tres anos caeu un 20,2%.
Máis cartos en publicidade
As boas noticias para a prensa en papel en que o mercado publicitario segue a dar síntomas de revitalización, sobre todo estimulado polos anunciantes públicos. La Voz declarou a AEDE, a patronal do sector, uns 1,8 millóns de vendas de publicidade en outubro, o que supún unha suba do 8,4% respecto o ano pasado.
