Comeza o desmonte do viaduto do Castro na A-6 na calzada sentido Madrid

Galicia e Castela e León piden unha xuntanza para saber como van as obras.

Por Europa Press / Redacción | VALLADOLID | 01/02/2023 | Actualizada ás 15:35

Comparte esta noticia

O Ministerio de Transportes, Mobilidade e Axenda Urbana (Mitma) iniciou este mércores o desmonte dos dous vans do viaduto do Castro (viaduto curto) da autovía do Nordés A-6, quilómetro 430, sentido Madrid, situado no municipio de Vega de Valcarce, provincia de León, e adxacente ao túnel de Pedrafita do Cebreiro, na provincia de Lugo.

Así, Mitma pon en marcha os traballos encamiñados á construción do novo viaduto sentido Madrid no día no que, ademais, o director xeral de Estradas e Infraestruturas da Xunta de Castela e León, Jesús Porta, e o director da Axencia Galega de Infraestruturas, Francisco Menéndez, remitiron ao director xeral de Estradas do Ministerio de Transportes, Juan Pedro Fernández, senllas cartas para demandar un encontro técnico con ambas as comunidades para abordar os prazos destes viadutos.

No entanto, o Ministerio, a través dun comunicado de prensa recollido por Europa Press, informou de que tras a análise de varios procedementos de desmonte decantouse finalmente pola demolición con robot, procedemento análogo ao xa empregado para o desmonte do van 2 do viaduto da calzada sentido A Coruña (viaduto colapsado).

Neste caso, tamén se priorizou "ao máximo" a seguridade dos traballadores, polo que os medios auxiliares necesarios para desmontar o van situaranse fóra dos viadutos, operados de forma remota. Unha vez realizado o desmonte dos dous vans, procederase a desmontar a pila intermedia e a retirar os restos da estrutura, de acordo cos procedementos vixentes de xestión de residuos.

Guindastres e operarios traballan durante o desmonte das pilas 1 e 2 do viaduto do Castro, no quilómetro 430 sentido A Coruña da autovía A-6, en Vega de Valcarcel
Guindastres e operarios traballan durante o desmonte das pilas 1 e 2 do viaduto do Castro, no quilómetro 430 sentido A Coruña da autovía A-6, en Vega de Valcarcel | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta