Tensión política arredor da sanidade pública ante a proximidade da manifestación do 12 de febreiro
O PP acusa a BNG e PSdeG de querer sacar rédito político da manifestación e que as críticas das forzas da oposición carecen de "reflexión".
Por Europa Press / Redacción | Santiago | 06/02/2023 | Actualizada ás 14:55
O foco do debate na política autonómica volverá estar estes días na situación da sanidade pública, que centrará boa parte do pleno do Parlamento galego que arrinca este martes nunha semana que culminará o vindeiro domingo coa manifestación convocada pola plataforma SOS Sanidade Pública e apoiada polos grupos da oposición, aos que o PP acusa de tratar de sacar rédito electoral destes problemas.
Esta foi a mensaxe que lanzou o portavoz parlamentario dos populares galegos, Pedro Puy, que, durante unha rolda de prensa celebrada este luns na Cámara autonómica, aseverou que as críticas de BNG e PSdeG sobre a xestión da Xunta en materia sanitaria carecen de "reflexión" e non parten de "un estudo serio" pois, di, perseguen lograr "un rédito electoral" sobre cuestións que "afectan a todas as comunidades autónomas", nalgunhas delas "con peores" realidades que a de Galicia.
A poucos días da manifestación que percorrerá o vindeiro domingo día 12 Santiago en defensa da sanidade pública e que desde o Goberno galego cualifican de partidista, o grupo que sostén o executivo presidido por Alfonso Rueda solicitará o apoio do Lexislativo autonómico á proposta de ampliar ata os 72 anos a idade de xubilación dos médicos de familia como vía para paliar o déficit de profesionais na atención primaria.
Este luns, Puy defendeu que existen "antecedentes" sobre a eficacia de medidas similares noutros ámbitos como o da xustiza e que o que persegue a iniciativa que levarán os populares ao pleno que arrinca este martes é que o Parlamento autonómico apoie a iniciativa da Xunta ante unha ampliación que require de decisións que dependen do Goberno central.
Así as cousas, tras recoñecer que existe a vontade do Executivo central de realizar esta modificación para ampliar a idade de xubilación e que a Xunta "traballa para que a redacción non prexudique a situación" senón que "a mellore"; o portavoz dos populares censurou á oposición por manter as súas reclamacións "na evidencia numérica" de pedir incrementos orzamentarios que, segundo Puy, xa se están "levando a cabo" ao longo dos últimos exercicios.
PONTÓN LAMENTA "SOBERBIA" E "INSULTOS"
Nesta semana marcada polo horizonte da manifestación do domingo, a líder do BNG, Ana Pontón, animou a todos os galegos a secundar a convocatoria de SOS Sanidade Pública. "Temos que defender o que máis nos importa, que é a saúde e para iso necesitamos unha sanidade pública reforzada e non con recortes como nos deixa o PP", remarcou a portavoz nacional do Bloque.
Fronte ás acusacións dos populares de que detrás da manifestación do próximo domingo 12 está a propia formación nacionalista, Pontón insta ao PP a "abandonar a soberbia e os insultos que lle está dando á cidadanía que se manifesta"· "O que debe facer é anunciar un cambio de rumbo na sanidade galega pública deste país", aseverou.
A dirixente nacionalista expresou a súa "moita preocupación co que está a pasar na sanidade pública deste país", en que "un goberno do PP converteuse nun perigo para a saúde dos galegos, despois de 13 anos de recortes e privatizacións".
PSDEG PIDE A RUEDA QUE "ASUMA QUE É PRESIDENTE"
"É hora de que Alfonso Rueda asuma que é presidente. Por moito que o sexa por un accidente do PP, ten a máxima responsabilidade na situación da sanidade", espetou o portavos socialista no Pazo do Hórreo, Luís Álvarez, que acusou á Xunta de tratar de "normalizar" o "colapso tras colapso" que se vive no Sergas.
O responsable do PSdeG cre que a Consellería de Sanidade se enfronta a esta realidade con "medidas improvisadas" e "anuncios e máis anuncios", o último, a "ocorrencia" de propor a ampliación da idade para xubilarse que, di, "sitúa a posible solución" fose do ámbito competencial do Goberno autonómico. "Vai na liña de expor medidas fóra da lóxica. E iso ten un nome: populismo".
"Como sempre, a culpa é do Goberno central", ironizou Álvarez antes de facer un chamamento a secundar a manifestación do próximo domingo en Santiago, que reivindicou como unha mobilización "social" e non política como a cualificou o Partido Popular nos últimos días.
Para Álvarez, a Xunta e os populares tratan así de "desmovilizar" e "deslexitimar" as protestas cidadás contra unha situación que ve derivada dos anos de Alberto Núñez Feijóo á fronte da Xunta e do seu sucesor, Alfonso Rueda. "Non nos podemos seguir resignando a esta situación", concluíu.
