O PPdeG lánzase a "tinguir Galicia de azul" nas municipais: "Non nos vale co 9, temos que ir a polo 10"
'Galicia entre todos': lema co que o PPdeG se lanza a por maiorías absolutas o 28M fronte a "pactos de perdedores"
Por Europa Press / Redacción | SANTIAGO DE COMPOSTELA | 01/03/2023 | Actualizada ás 14:06
O PPdeG celebrou este mércores a primeira reunión do seu comité de campaña para as eleccións municipais do 28 de maio, nas que terá por lema 'Galicia entre todos', con independencia de que as candidaturas en cada un dos 313 concellos poida varialo.
A secretaria xeral dos populares galegos, Paula Prado, foi a encargada de dirixir este encontro celebrado na sede do partido en Santiago. Desde alí, marcou o xa habitual reto de conseguir maiorías absolutas nas corporacións locais, porque gañar os comicios "non é suficiente" para que as alcaldías acaben en mans do que denominou "pactos de perdedores", en referencia aos acordos establecidos entre forzas de esquerdas.
"Probablemente sexamos a forza máis votada en todos os municipios de Galicia, pero iso non é suficiente. Temos que chegar á maioría suficiente para poder gobernar, non nos chega con ter un sobresaliente, non nos chega cun 9. Temos que ter o 10, a matrícula de honra, ir a pola maioría absoluta", insistiu a 'número dous' do PPdeG, en declaracións á prensa.
Coa lema 'Galicia entre todos', os populares pretenden presentar o seu proxecto de gobernos de "solvencia" --puxo como exemplo o da Xunta-- cunha chamada á participación: "Son tres palabras fundamentais porque unha persoa soa, un partido só, non somos capaces de chegar a todas partes".
"TINGUIR GALICIA DE AZUL"
O obxectivo, tal e como remarcou a secretaria xeral, é "tinguir Galicia de azul" a noite do 28 de maio e facelo con maioría absoluta. Tamén nas cidades, un ámbito no que son conscientes de que "se lles resiste máis" --actualmente, non gobernan en ningunha do sete urbes-- pero no que ven unha tendencia "á alza" a través das enquisas.
Paula Prado tamén aproveitou esta comparecencia para cargar contra un BNG "instalado no independentismo e no ecoloxismo radical, que tanto dano está a facer" ao territorio galego na agricultura e na pesca, segundo dixo.
Así mesmo, sobre o PSdeG, apuntou ás "crises constantes" que está a vivir con "renuncias, cesamentos e dimisións de concelleiras", así como co "nerviosismo" pola suposta implicación de deputados socialistas galegos no caso 'Mediador'.
