Por E.P. | SANTIAGO DE COMPOSTELA | 09/03/2023 | Actualizada ás 13:29
O BNG demandará no Congreso a derrogación da Lei de Tauromaquia e a supresión de todo tipo de apoio brindado desde as administracións á organización de actos asociados ao sector do touro.
O deputado frontista na Cámara baixa, Néstor Rego, defenderá unha iniciativa o vindeiro martes na que reclamará que o Estado "deixe de fomentar, protexer e valorizar os espectáculos taurinos".
Así, o nacionalista reclamará a derrogación da Lei para a regulación da Tauromaquia, a eliminación do premio nacional "e calquera medida que supoña subvencións, investimentos, beneficios fiscais ou calquera outra forma de financiamento público".
Deste xeito, Rego lamentou que a Lei de Protección Animal do Goberno deixase fose as corridas de touros, que considera "a máxima expresión dos malos tratos animais".
"O BNG ten clara a súa posición sobre as corridas de touros: non son cultura, son tortura. Por iso defenderemos esta iniciativa no Congreso para derrogar a lei que regula a tauromaquia como patrimonio cultural e suprimir todas as medidas de fomento, protección ou valorización dos espectáculos taurinos por parte dos poderes públicos", incidiu Rego.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.