O TSXG recoñece a pensión de viuvez a unha muller separada por ser vítima de violencia de xénero

A Sala do Social do Tribunal Superior de Xustiza de Galicia (TSXG) recoñeceu o dereito a unha muller, separada en 1986 e divorciada en 1996, a cobrar a pensión de viuvez por ser vítima de violencia de xénero. O alto tribunal acolle, desta forma, o recurso presentado pola afectada contra unha sentenza emitida polo Xulgado do Social número 3 de Ourense que desestimou a demanda que interpuxo contra o Instituto Nacional da Seguridade Social e a Tesouraría Xeral da Seguridade Social.

Os maxistrados explican na resolución que o debate se centra en determinar se a muller ten dereito á contía íntegra da pensión de viuvez, sen a limitación da pensión compensatoria, por ser vítima de violencia de xénero ou, pola contra, non ten ese dereito porque non hai proba de que fose vítima de violencia de xénero, tal e como se declarou na sentenza de primeira instancia.

Neste caso, segundo explica o TSXG na resolución, "a pensión compensatoria tense, pero por un importe ínfimo de 70 euros, e o que se pide é a pensión de viuvez íntegra por ser a demandante vítima de violencia de xénero".

ARGUMENTOS

Os maxistrados subliñan que o lexislador "non esixe que a condición de vítima de violencia de xénero estea acreditada a través de proba plena e mediante sentenza", pois recalcan que "tamén lle valen medios concretos que non son expresivos da proba inequívoca de tal circunstancia, pois a norma fala de calquera outro medio de proba admitido en Dereito".

"No caso de autos, entendemos que quedou probado que a actora foi vítima de violencia de xénero de forma, ademais, reiterada, e non hai dúbida de que o foi ao tempo da separación, tal como esixe a norma, co cal se dan todos os requisitos legalmente esixidos", conclúe o alto tribunal galego.

Acto de apertura do Ano Xudicial no Tribunal Superior de Xustiza de Galicia (TSXG) | Fonte: TSXG