A operación retorno de Semana Santa desenvólvese con normalidade nas estradas galegas
A Dirección Xeral de Tráfico (DGT) insistiu en chamar á prudencia ao volante e lembrou a recomendación de cero alcol, conducir a unha velocidade adecuada, facer descansos cada dúas horas e pór o cinto.
Por Europa Press / Redacción | Santiago | 09/04/2023 | Actualizada ás 19:49
A normalidade impera nas principais estradas galegas este domingo, día de operación retorno na rexión ao non ser festivo este Luns de Pascua.
A Dirección Xeral de Tráfico (DGT) puxo en marcha o pasado mércores a segunda fase da Operación Especial de Tráfico de Semana Santa, na que se esperaban 9,4 millóns de desprazamentos, un 2,47% máis que o ano pasado. É a fase máis importante desta operación especial que se puxo en marcha o venres 31 de marzo e que se dará por pechada ás 24 horas do luns 10 de abril.
A DGT estima que durante estes días producirase unha media de 1.566.667 desprazamentos diarios. O organismo insistiu en chamar á prudencia ao volante e lembrou a recomendación de cero alcol, conducir a unha velocidade adecuada, facer descansos cada dúas horas ou 200 quilómetros e pór o cinto.
Na xornada do domingo comeza o primeiro retorno desta Operación Especial nas comunidades de Madrid, Andalucía, Aragón, Asturias, Canarias, Cantabria, Castela-A Mancha, Castela e León, Estremadura, Galicia e Murcia, polo que durante todo o día instalaranse medidas de ordenación e regulación do tráfico para favorecer a entrada de vehículos aos grandes núcleos urbanos.
A DGT prevé que poden producirse problemas de circulación, especialmente entre as 13 e as 23 horas, nos principais eixos viarios de comunicación que canalizan todo o movemento de retorno da Semana Santa, destacando pola súa intensidade a rede de interese xeral, autoestradas e autovías, así como as estradas de zonas de costa e litoral e, xa a última hora da tarde, os accesos dos grandes núcleos urbanos.
