Por Galicia Confidencial | FONSAGRADA | 15/04/2023 | Actualizada ás 12:00
O Colexio de Arquitectos de España deu a coñecer as 12 propostas galegas seleccionadas, dun total de 429 presentadas, para a seguinte fase dos Premios Arquitectura. Entre as seleccionadas atópase Olladas de Barbeitos, un conxunto de apartamentos galego, situado en plena natureza, foi deseñada da man dos arquitectos Alfonso Salgado e Francisco Xabier Liñares.
Olladas de Barbeitos foi seleccionado como unha das propostas destacadas no Concurso Nacional de Arquitectura na categoría de rehabilitación. O proxecto transformou un antigo espazo situado na Fonsagrada, dedicado á gandería nunha colección de apartamentos de deseño situados en plena natureza. O cortello era unha edificación feita no ano 1973, ampliada nos 90 e en desuso desde o 2008.
"A coidadosa rehabilitación deste espazo permitiu conservar a historia e a esencia da rexión, á vez que se adaptou para ofrecer aos viaxeiros máis esixentes unha experiencia única nunha contorna tranquila, privada e rodeada da beleza natural de Barbeitos na Fonsagrada, aos pés dos Ancares", explican desde Olladas de Barbeitos.
"Os nosos apartamentos están concibidos para ofrecer tranquilidade, privacidade e introspección, permitindo aos nosos hóspedes conectar e gozar plenamente da natureza en todo o seu esplendor", afirma Ana Belén López. "Estamos encantados de ser seleccionados para pasar á última fase do Concurso Nacional de Arquitectura do Colexio de Arquitectos de España e de poder compartir a nosa proposta turística co público".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.