O PP pide a Carmela Silva que "dea a cara" ante a orde de ingreso en prisión para o condenado polo 'caso enchufe'

O portavoz do grupo do PP na Deputación de Pontevedra, Jorge Cubela, cualificou como "escandaloso" o silencio da presidenta da institución, Carmela Silva, e do seu partido, o PSdeG-PSOE, ante a orde de ingreso en prisión para o exfuncionario do Concello de Vigo condenado por 'enchufar' á cuñada de Silva nunha contrata municipal.

Cubela preguntou "canto máis vai tardar" a presidenta da Deputación "en dar a cara" para ofrecer explicacións ou asumir algún tipo de responsabilidade despois de que os tribunais considerasen probado que o seu familiar cobrou 108.000 euros por un traballo que nunca realizou nunha concesionaria na que foi "enchufada".

Tras o auto da Audiencia Provincial que outorgaba 5 días ao exfuncionario condenado por eses feitos (auto que foi recorrido), o PP lembrou que "os socialistas" reclamaron o indulto do procesado.

Así mesmo, Cubela insistiu en que "para que ese alto funcionario execute, hai alguén que dá a orde". "Ou seica pretenden Silva e Abel Caballero que creamos que foi decisión exclusiva do funcionario? De todas as persoas que podía 'enchufar', elixiu por casualidade á cuñada de Carmela Silva?",ironizou o portavoz 'popular'.

Respecto diso, criticou que a presidenta da Deputación, "a quen tanto lle gusta pedir explicacións a todo o mundo", segue "calada" e non se pronunciou sobre ese caso, quizá porque "ten moito que ocultar". "A ciudadania merece explicacións, e non políticos que se esconden detrás de funcionarios", proclamou.

Carmela Silva, presidenta da Deputación.. DEPUTACIÓN DE PONTEVEDRA