Por Europa Press / Redacción | Santiago de Compostela | 16/05/2023 | Actualizada ás 13:17
O xulgado de Instrución número 2 de Ourense incoou dilixencias de investigación en relación a unha denuncia por unha suposta violación contra un xogador de baloncesto, uns feitos que se remontan a xaneiro deste ano. En concreto, fontes do Tribunal Superior de Xustiza de Galicia (TSXG) confirmaron que as dilixencias abrironse o pasado 27 de abril, aínda que a denuncia interpúxose o pasado 15 de febreiro en sede policial.
O xulgado tomou esta decisión tras recibir o ateigado cunha denuncia por agresión sexual presentada por unha moza da cidade, uns feitos que terían lugar no mes de xaneiro, no que o equipo no que militaba entón o denunciado, desprazouse a Ourense para xogar un partido.
Este luns, o exclub do xogador de baloncesto acusado, o MoraBanc Andorra, emitiu un comunicado nas súas redes sociais no que aclaraba que non coñecía o caso e que "nunca se lle informou sobre a denuncia". Así mesmo, púxose a disposición da xustiza, condenou "sen fisuras" a violencia de xénero e expresou todo o seu apoio á presunta vítima.
O denunciado tamén realizou na mañá deste martes unha publicación nas súas redes sociais nas que expresa a súa confianza na xustiza: "Son consciente do que se está dicindo de min. Pido máximo respecto á presunción de inocencia e confío plenamente na xustiza", apunta. Polo momento este non prestou declaración en sede xudicial pero si está sendo investigado por un delito de agresión sexual, apuntan fontes do TSXG.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.