Rexeitado o recurso de Vox que pedía a súa participación nos debates e entrevistas electorais da CRTVG

Os dous recursos presentados contra o Plan de Cobertura posto en marcha pola CRTVG con motivo das eleccións municipais do próximo 28 de maio foron rexeitados. Diso informou a corporación nun comunicado, no que explica que este venres a Xunta electoral central comunicou a súa decisión sobre o último recurso que quedaba por resolver, o presentado pola formación política Vox, que pedía a súa participación nos debates e nas entrevistas reflectidas no plan de cobertura.

Segundo apunta a CRTVG, a resolución recoñece a Vox a condición de grupo político significativo --como xa se recollía no propio plan--, pero non avala a súa participación nos debates e entrevistas ao non ter representación actualmente en ningún dos consistorios en xogo.

A corporación lembrou que o pasado 8 de maio a xunta electoral provincial desestimou tamén o recurso presentado contra o Plan de cobertura, neste caso, por parte do BNG, que introducía cinco alegacións ao documento aprobado.

Entre outras cuestións, o Bloque presentou recurso por entender que "os medios públicos minimizaban a difusión dunha información fundamental para a cidadanía, relegando a horarios de moi escasa audiencia entrevistas e debates". Ademais, os nacionalistas consideraban "desproporcionado" o tempo asignado a forzas como Vox e vían "incompleto" o plan por non especificar a programación especial da xornada electoral. Tamén pedían a realización de entrevistas aos principais candidatos en horarios e formatos de maior audiencia.

Pola súa banda, a CRTVG sinalou que a xunta electoral provincial desestimou todas as alegacións e resolveu que "a potestade organizativa dos medios de comunicación no exercicio da súa autonomía informativa" fai que "non poidan someterse a revisión os seus criterios sobre o obxecto do debate convocado", salvo "discriminación ou arbitrariedade", cuestións que considera que "non concorren" no caso.

Deste xeito, a corporación sinala que, ao non existir máis recursos presentados ante os organismos competentes, o Plan de cobertura da CRTVG queda referendado na súa totalidade.

Estudio da Corporación de Radio Televisión de Galicia (CRTVG) preparado para un debate electoral | Fonte: CRTVG - Arquivo