O BNG enfróntase o 28M ao seu primeiro exame logo do resultado "histórico" do 2020
Desembarcará na última semana da carreira cara ás urnas nas cidades galegas máis poboadas
Por Europa Press / Redacción | SANTIAGO DE COMPOSTELA | 19/05/2023 | Actualizada ás 18:51
A caravana do Bloque Nacionalista Galego (BNG) co seu líder á cabeza, Ana Pontón, desembarcará na última semana da carreira cara ás urnas nas cidades galegas máis poboadas, un último alento no que a formación nacionalista pretende afianzarse como forza de goberno nunha alternativa de esquerdas.
Non en balde, o BNG ten nestas eleccións a primeira proba despois das autonómicas que situaron á formación como segunda forza política no Parlamento, por diante do PSdeG que, no entanto, garda nos bastóns de mando a súa maior influencia política en Galicia con cinco alcaldías de sete entre as principais urbes.
Os nacionalistas xóganse nestas eleccións ser chave nos gobernos municipais, despois de que en 2019 recuperasen parte do terreo perdido fronte ás mareas municipalistas tras o 'sorpaso' que lle deron en 2015.
Cun BNG que Pontón destaca que está "a crecer" máis que as demais formacións, os nacionalistas buscarán esta semana dar o último impulso ás candidaturas das urbes e situarse de novo como referente no terreo da esquerda, pasando por diante ás mareas municipalistas das cidades.
Nese escenario, abriríase a oportunidade de entrar en máis gobernos municipais, o cal non foi posible en 2019, e presentarse ás autonómicas con máis poder local para dar impulso a Ana Pontón, que se xogará nas galegas o exame como líder do Bloque.
ÚLTIMOS PERCORRIDOS
Tras o paso por Pontevedra deste venres, a única urbe galega no que o BNG ostenta a Alcaldía desde hai máis de 24 anos, a líder do Bloque irá a vilas intermedias este fin de semana, entre elas, a Allariz, outro dos bastións históricos dos nacionalistas nunha provincia na que o PP foi preeminente na democracia.
Pontón tamén desembarcará noutras dúas prazas con fortalezas para o nacionalismo como son Moaña e Ponteareas durante este fin de semana, para coller o alento antes de envorcarse nas cidades no últimos cinco días da campaña, ademais de visitar áreas de influencia nas comarcas nas que estea, como A Mariña, Tomiño, Rianxo ou Ribadavia.
Así as cousas, Pontón arrincará a semana cun mitin en Ourense, para seguir en Santiago de Compostela, Lugo, Vigo e pechar o venres na Coruña coa arenga final de que todas aquelas persoas que votaron ao BNG nas autonómicas en 2020, e situaron á formación nacionalista como segunda no Parlamento, volvan confiar na organización que ela segue liderando.
Non en balde, a portavoz nacional sométese ao primeiro exame desde este resultado "histórico" de xullo de 2020 e ten a proba final antes das autonómicas nas que, como ela mesmo repetiu nos últimos anos, aspira a ser a "primeira presidenta da Xunta".
