Por Europa Press / Redacción | SANTIAGO DE COMPOSTELA | 27/05/2023 | Actualizada ás 13:33
A portavoz nacional do BNG, Ana Pontón, fixo un chamamento á poboación para que acuda a votar este domingo para "elixir os mellores gobernos municipais", á vez que confiou nunha "gran participación" nos comicios.
No día de reflexión, Ana Pontón e a candidata á alcaldía de Santiago de Compostela, Goretti Sanmartin, arrincaron a xornada participando nun almorzo con amizades e membros da candidatura de Santiago.
Tras unha intensa campaña que Pontón cualificou de "ilusionante", a nacionalista incidiu na importancia "dunha gran participación dos veciños e veciñas", porque é a cidadanía a que "ten o poder de decidir".
Canta máis participación "mellor iralle a Galicia", dixo Ana Pontón, que destacou que esta é "a esencia da democracia", a expresión da vontade popular nas urnas. Pola súa banda, Goretti Sanmartín tamén fixo un chamamento a que a xente reflexione "porque todos os votos son decisivos e é moi importante que as eleccións sexan para conformar, a partir do 28 de maio, o mellor goberno para Santiago de Compostela".
Tras o almorzo, a candidata nacionalista participou na visita á exposición dos '50 anos de Fuxan Os Ventos' acompañada pola candidatura do BNG e guiada por Tereixa Novo, compoñente histórica do grupo. Durante a xornada de reflexión, Sanmartín tamén asistirá a diversas actividades no Barrio Xardín e na Praza 8 de Marzo para dedicar o resto do día á familia e amizades. Ana Pontón, pola súa banda, participará nunha excursión organizada polo centro escolar ao que acode a súa filla.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.