O BNG denuncia o veto de PP e PSOE aos afectados pola contaminación do encoro das Conchas
Ana Miranda considera “imprescindible” escoitar os colectivos e anuncia unha visita ao encoro este venres
- Quen ten a culpa da contaminación do encoro das Conchas: Xunta e CHMS botan balóns fóra mentres anuncian recursos
- O encoro das Conchas, símbolo da contaminación gandeira industrial
Por Europa Press / Redacción | Santiago de Compostela | 16/07/2025 | Actualizada ás 15:33
A eurodeputada do BNG, Ana Miranda, denunciou que o PP e o PSOE abstivéronse na reunión de coordinadores da Comisión de Peticións da Eurocámara para "evitar" que os colectivos afectados pola contaminación do encoro das Conchas comparezan na sesión desta comisión no mes de setembro.
"Desde o BNG e como eurodeputada galega pedín que se reabrise este asunto para que viñesen os colectivos a comparecer. A nosa sorpresa foi que o Partido Popular e o Partido Socialista impediron que veñan comparecer no mes de setembro, mesmo ante a sentenza que lle dá a razón aos colectivos", manifestou Miranda.
Nesta liña, a eurodeputada do BNG considerou "imprescindible" que haxa "información directa da Comisión Europea para actualizar a información". Tamén defendeu que no mes de outubro os colectivos poidan comparecer na Comisión de Peticións dese mes. Ademais, os nacionalistas avanzaron que o vindeiro venres Ana Miranda visitará o encoro para explicar as actuacións levadas a cabo polo BNG no Parlamento Europeo a este respecto.
