As mulleres vítimas de explotación sexual terán as axudas da Xunta por violencia de xénero

O Diario Oficial de Galicia publica este xoves unha resolución da Consellería de Promoción do Emprego e Igualdade pola que se estenden as axudas periódicas a vítimas de violencia de xénero ás mulleres que sofren explotación sexual. Esta medida tómase de acordo coa Lei de garantía integral de liberdade sexual para dar cobertura a este colectivo e garantirlle unhas condicións suficientes de independencia económica,

A efectos da lei galega de tratamento integral de violencia de xénero, considérase vítima de explotación sexual aquela muller que realice o exercicio da prostitución, incluídos actos pornográficos ou produción de material pornográfico, con obtención de lucro por parte dunha terceira persoa, física ou xurídica, cando a vítima se atope nunha situación de vulnerabilidade persoal ou económica, ou se impoñan condicións gravosas, desproporcionadas ou abusivas.

Con iso, estas axudas periódicas, con prazo de solicitude aberto todo o ano, poderán ser recibidas por vítimas de violencia física, violencia psicolóxica, trata de mulleres e nenas, violencia vicaria e vítimas de explotación sexual. Entre as condicións da orde está ter residencia legal en España, ou autorización provisional expedida en circunstancias excepcionais.