O 73% dos asalariados galegos son funcionarios ou traballan no sector servizos

O peso dos salarios no Produto Interior Bruto (PIB) de Galicia baixou en máis de dous puntos porcentuais, ata situarse no 44% en 2022, o que supón case tres puntos menos que a media nacional (46,9%). Así se desprende do estudo 'A remuneración do factor traballo na economía galega' publicado este venres polo Instituto Galego de Estatística (IGE), que explica que este indicador alcanzou o seu nivel máximo en 2009, situándose no 48% do PIB.

A partir de aí, comezou un descenso ata que en 2018, 2019 e 2020 volveu crecer, iniciando de novo a súa caída ata o ano pasado. No total de España, o peso no PIB dos salarios no exercicio de 2022 tamén foi menor ao de 2009, seguindo unha senda similar ao caso galego e caendo algo máis dun punto e medio entre 2021 e 2022, sempre segundo o informe do IGE, recollido por Europa Press.

Pola súa banda, en termos correntes, a evolución da remuneración de asalariados en Galicia volveu ser positiva en 2022, pero crecendo menos do que o fixo en 2021. En concreto, os salarios subiron un 3,6% o ano pasado e un 5,3% en 2021. Con todo, a media estatal foi dun incremento do 6,5% en 2022 e do 5,3% en 2021.

ONDE TRABALLAN

A remuneración por hora situouse nos 19,9 euros, 0,2 euros máis que en 2021. No total de España, este dato foi de 22,5 euros, 0,4 euros máis que un ano antes. É o sector servizos --funcionariado e empregados de hostalaría e restauración, entre outros-- o que emprega ao 73,22% dos asalariados galegos, seguidos da industria e a enerxía, cun 17,24% e da construción, co 7,77% dos casos. A agricultura, gandaría, silvicultura e a pesca supoñen só un 1,76%.

A nivel estatal, o peso dos servizos escala ata o 79,29%, polo que a industria queda cun 13,61% e a construción cun 6,2%, así como cun 0,9% a agricultura, gandaría, silvicultura e pesca.