Recunca Estrela Vermelha
O equipo compostelán, invicto a falla de dúas xornadas, gaña a Liga Galega de fútbol gaélico por segundo ano consecutivo. Irmandinhas da Estrada, campioas en categoría feminina.
Por gcdeportes | Compostela | 19/03/2015 | Actualizada ás 08:30
Doce partidos, doce vitorias. A falla de dúas xornadas, o Estrela Vermella proclamouse de novo vencedor da segunda edición da Liga Galega de fútbol gaélico. Foi a pasada fin de semana, tras vencer 20-13 a Fillos de Breogán, segundo na táboa, no campo da Canhoteira en Cacheiras.
Van dúas edicións da Liga Galega, e as dúas foron gañadas con autoridade polo Estrela Vermelha compostelán, que tamén sumou a primeira e única Copa galega, celebrada na Estrada, vencendo na final aos anfitrións, os Irmandinhos. O Estrela Vermelha celebrará este o seu segundo título esta fin de semana en Compostela. Será o sábado na Casa do Patín ás 23.00 horas, coincidindo coa festa do 18º aniversario da entidade.
A Liga 2014-2015 contou con oito equipos, pero a organización, Asociación Galega de Fútbol Gaélico, traballa xa na vindeira edición, que podería contar con ata doce equipos e dous grupos. O rival a bater será, unha vez máis, o Estrela Vermelha.
Pola súa banda, ao igual que o Estrela Vermelha, as Irmandinhas da Estrada repetiron título en categoría feminina. Suman todos os seus partidos por vitorias, e gañaron a segunda edición da Liga Galega feminina. Agora loitarán pola segunda Copa consecutiva.
