O prazo de inscrición para o programa de minicampamentos da Xunta 'Coñece Galicia' abre este luns

A Xunta abre o luns o prazo para inscribirse na cuarta edición do programa de minicampamentos 'Coñece Galicia'. A través desta iniciativa, ofrécense 600 prazas para nenos e nenas de entre 10 e 14 anos para que gocen de estancias de cinco días en doce establecementos hostaleiros de Galicia.

Tal e como informou a Consellería de Política Social e Xuventude, a inscrición poderase facer a través do formulario que se habilitará na páxina web de Xuventude. O prazo de solicitude permanecerá aberto ata cinco días antes da celebración do minicampamento ou ata esgotar prazas. En canto á adxudicación de prazas, farase por orde de inscrición.

Nesta edición, o programa 'Coñece Galicia' incorpora dúas novas localizacións con respecto ao pasado verán: o hotel Candor da Lama (Pontevedra) e o hotel Laias de Cenlle (Ourense). Así, a proposta deste ano inclúe os seguintes minicampamentos na provincia da Coruña: Valdoviño Mariño III, con actividades náuticas e sendeirismo; e Descubrindo a Bela Fisterra II, con propostas para góceo do medio mariño.

Na provincia lucense ofértase A conquista de Foz IV, con actividades de multiaventura e coñecemento do patrimonio natural e cultural; Aventura na Montaña IV, en Piornedo-Cervantes; A descuberta dá A Pobra do Brollón III, centrado no turismo de natureza e educación ambiental; e Xeocampamento nas montañas do Courel III, en Folgoso do Courel.

Así mesmo, a provincia de Ourense acollerá os minicampamentos Somérxete na natureza III, que se desenvolverá na Pobra de Trives; Acción no Arnoia III, no que os participantes coñecerán o patrimonio natural de Allariz e a súa contorna; e un novo que terá como aloxamento o albergue turístico de Laias en Cenlle e que levará por nome Ecoverán termal en Laias. Neste minicampamento desenvolveranse actividades de natación nas piscinas de Laias e deportes náuticos no encoro de Castrelo de Miño, ademais de visitas culturais na contorna e rutas de sendeirismo.

Por último, na provincia de Pontevedra celebraranse as propostas Aventura en Paradanta III, en Covelo e centrado no goce do medio rural; Minicampamento Natura IV, en Sanxenxo e a nova proposta Aventura e natureza rural no concello da Lama.

A directora xeral de Xuventude, Cristina Pichel, visita un campamento en Boiro.. XUNTA