Rafa Domínguez presentará a súa candidatura a alcalde de Pontevedra por se o PSOE non apoia a Lores
"Non necesito que o PSOE me vote a min, necesito que o PSOE se vote a si mesmo", insistiu este xoves nunha rolda de prensa o presidente do PP local de Pontevedra.
Por Europa Press / Redacción | SANTIAGO DE COMPOSTELA | 15/06/2023 | Actualizada ás 14:08
O presidente do Partido Popular de Pontevedra, Rafa Domínguez, anunciou que presentará a súa candidatura para a Alcaldía de Pontevedra no pleno de investidura deste sábado, á espera de que o PSdeG-PSOE se absteña ou se vote a si mesmo en lugar de apoiar a continuidade do rexedor en funcións, Miguel Anxo Fernández Lores, do BNG.
"Non é necesario que o Partido Socialista vote a Rafa Domínguez como candidato á Alcaldía", lembrou o popular, "simplemente" tería que votar ao seu número uno, Iván Pontes, para que o Partido Popular gañe. "Non necesito que o PSOE me vote a min, necesito que o PSOE se vote a si mesmo", insistiu este xoves nunha rolda de prensa.
"Entendendo as dificultades e o difícil de que isto suceda. Creo que o gañar as eleccións de maneira contundente obrígame a que me postule como candidato á Alcaldía", manifestou Domínguez.
A do PP foi a lista máis votada nas eleccións locais do pasado 28 de maio, obtendo máis de 16.000 votos e un respaldo do case 40% dos votantes. Estes resultados, para Domínguez, reforzan a posición do Partido Popular "como o mellor representante dos intereses e inquietudes dos pontevedreses".
"DESCONFIANZA" ENTRE BNG E PSOE
Doutra banda, o candidato popular incidiu en que "as negociacións entre o BNG e o PSOE evidenciaron aínda máis as diferenzas tanto políticas como persoais entre os principais líderes de ambos os partidos".
"Esta situación de desconfianza, e mesmo desprezo, entre os partidos non contribúe a unha xestión eficiente e representa un obstáculo para a gobernabilidade da cidade", argumentou o popular.
Con todo, as direccións de PSdeG-PSOE e BNG acordaron apoiarse mutuamente nas investiduras municipais, un pacto que Domínguez criticou porque implica "bloquear" calquera intento do PP de gobernar en Galicia. "É lamentable que o futuro de Pontevedra se decida en Santiago, lonxe da cidade e dos intereses dos seus habitantes", reprochou.
Por último, nun recoñecemento a "a forza" do PP local, Domínguez felicitou a Ana Pastor e Pepa Pardo, "compañeiras e amigas", pola súa designación como cabezas de lista ao Congreso e Senado, respectivamente.
