BNG e PSdeG critican a un PP "sen escrúpulos" por pactar con Jácome a pesar de dicir que non o faría

Nacionalistas e socialistas consideran que o pacto entre o PP e Jácome era "previsible" e acusan aos populares de "non ter escrúpulos" tras dicir en varias ocasións que non pactarían con el. O portavoz parlamentario do PSdeG, Luís Álvarez, asegurou que a súa formación fixo "todo o posible" para propiciar o cambio político en Ourense e considerou que mentres siga o Partido Popular na deputación continuará o "caciquismo e o escurantismo".

Nunha rolda de prensa celebrada este luns e preguntado polo pacto alcanzado entre Jácome e o Partido Popular, Álvarez sostivo que os socialistas fixeron "todo o posible sempre da man do BNG, o seu socio preferente", dentro das negociacións "frenéticas na provincia e na cidade".

Con todo, dixo que "había xogadores coas cartas marcadas na partida" e lembrou que, a pesar de que tanto o líder do PPdeG, Alfonso Rueda, como a secretaria xeral dos populares galegos, Paula Prado, aseguraron que traballarían para que Jácome "non volvese ser alcalde", o día 17 apareceu un documento "con firmas tanto de Jácome como dunha persoa por delegación de Paula Prado" co compromiso para garantir que o de Democracia Ourensá mantivese a alcaldía e o PP a deputación.

"Por tanto, confírmase que o PP está disposto a facer calquera cousa para manter a Deputación de Ourense e seguir co modelo de baltarismo sen Baltar, mantendo toda a rede de influencias para manter o control e a repartición de axudas aos concellos", apuntou.

Así as cousas, considerou que "o PP non ten ningún tipo de escrúpulos" e que "pouco lle preocupa o benestar e a limpeza das institucións". "Aínda temos tímpanos vibrando con determinados audios de Jácome que pon en cuestión a limpeza democrática e de xestión", dixo.

NEGOCIACIÓNS

Ademais, preguntado polas negociacións do PSdeG con Jácome despois de que transcendese unha foto do secretario de Organización, José Manuel Lage Tuñas, co alcalde de Ourense no aparcadoiro da Cidade da Cultura, Luís Álvarez sostivo que o Partido Socialista o que fixo foi "escoitar a todo o mundo".

"E a foto foi dun encontro propiciado polo propio Jácome, ao que Lage acudiu porque quería ter todas as cartas da baralla para xogar a partida, pero outros tiñan as cartas marcadas", afirmou.

BNG

Pola súa banda, a portavoz nacional do BNG, Ana Pontón, sostivo que o acordo do Partido Popular co líder de Democracia Ourensá, Gonzalo Pérez Jácome, era "moi previsible" porque os populares sempre "antepoñen o interese partidista ao interese da cidadanía".

"En Ourense pasou exactamente o que dixen que ía pasar, díxeno de forma pública, que era o escenario máis posible", dixo Pontón, que lembrou que afirmou que o PP pactaría de novo con Jácome "se era necesario para manter a poltrona caciquil" da Deputación de Ourense.

Tras soster que o PP "queda retratado" e que "lle importa máis o PP que calquera outra cousa", instou aos populares a "parar cos bulos". "Ata para o PP e para o señor Rueda os bulos deben de ter un límite, porque querer responsabilizar aos demais dos seus pactos é o colmo da indecencia política", afirmou.