O arcebispo de Santiago recibirá o palio bendicido polo papa

Varios arcebispos, entre eles cinco españois (o arcebispo electo de Madrid, José Cobo; o de Granada, José María Gil Tamayo; o de Santiago de Compostela, Francisco José Prieto; o de Valencia, Enrique Benavent; e o de Tánxer, Emilio Rocha) recibirán este xoves o palio bendicido polo papa.

O Pontífice celebrará unha eucaristía na basílica de San Pedro do Vaticano, coincidindo coa solemnidade de san Pedro e san Pablo, na que 32 arcebispos metropolitanos de todo o mundo nomeados durante o último ano recibirán o palio arcebispal bendicido polo pontífice.

O palio é o símbolo de comuñón co papa e representa a potestade dos prelados nas súas igrexas particulares. É un ornamento litúrxico que se coloca sobre os ombreiros, elaborado con la de cordeiros brancos. Neste sentido, simboliza o bo pastor que dá a vida polo seu rabaño, seguindo a Jesús.

Monseñor Francisco Prieto na súa toma de posesión como Arcebispo de Santiago de Compostela | Fonte: Arzobispado