CC.OO., ANPE e UGT levan á Xunta aos tribunais polos "incumprimentos" do acordo de cocientes asinado en 2023

Os sindicatos CCOO, ANPE e UGT anunciaron este martes a presentación dun recurso contencioso-administrativo ante a xustiza polos "incumprimentos" da Xunta na aplicación do acordo de redución de cocientes, asinado coas tres organizacións en outubro de 2023. Así o avanzaron o secretario de CCOO Ensino, Borja Campos, o presidente de ANPE Galicia, Xullo Díaz, e a responsable de UGT Ensino, Sandra Montero, nunha rolda de prensa celebrada en Santiago de Compostela.

A vía xudicial chega despois de esgotar os recursos administrativos e tras múltiples advertencias por parte dos sindicatos desde que arrincou o curso escolar 2024/25, cando empezou a aplicarse a nova normativa que establecía unha baixada paulatina dos alumnos por aula, de 25 a 20 en Infantil e Primaria. En concreto, a demanda interpúxose sobre as 9.30 horas da mañá ante o Xulgado do Contencioso-Administrativo de Santiago, co obxectivo final de reclamar o "cumprimento íntegro" do acordo ante a discrepancia da interpretación do texto.

Segundo explican os sindicatos, o documento asinado --mesmo leva a rúbrica do presidente da Xunta, Alfonso Rueda-- recolle a redución paulatina dos cocientes, empezando por 3º de Infantil, pero non doutras como a computación dobre ou triplo do alumnado con necesidades e dos cocientes en aulas mixtas, que son as que escolarizan nunha mesma aula a nenos de varios niveis. Ademais, as tres organizacións denuncian que o contido do acordo foi recollido na lei de medidas fiscais e administrativas que acompañaron aos orzamentos do Goberno galego de 2025, aínda que o texto variaba e fixaba unha aplicación "en varios anos e non de modo inmediato".

INCORPORARÍANSE OUTROS 396 DOCENTES

De acordo con cálculos dos sindicatos, se a Consellería de Educación aplicase de forma "axeitada" o asinado, incorporaríanse 396 docentes e 282 aulas a maiores ao evitar o peche de unidades. "Dise pronto, pero non son poucos", engadiu Sandra Montero (UGT). Borja Campos (CCOO) destacou que o acordo permitiu que, no curso que está a piques de finalizar, se creasen dez aulas e 21 prazas fixas de profesores a pesar da crise demográfica que sofre Galicia. "E iso cunha aplicación parcial", engadiu.

Xullo Díaz (ANPE) explicou que o motivo de acudir á xustiza a piques de finalizar o curso débese a que seguiron "todo o proceso administrativo" para que "ningún xuíz poida dicir" que desestima a demanda por defectos de forma. "Lonxe de permanecer inactivos, desde que detectamos os incumprimentos da Consellería emprendemos unha loita constante en todas as frontes posibles", asegurou Díaz, tras lembrar que o pasado outubro acudiron á Valedora do Pobo e que en meses recentes se interpuxo un recurso en vía administrativa, pero que foi desestimado ante a falta de contestación. Neste contexto, os tres sindicatos advirten que non descartan ningunha outra medida de presión.

MIRAN CARA VALENCIA

CCOO, ANPE e UGT advertiron que xa na Comunidade Valenciana se xudicializou un asunto parecido e o Tribunal Superior ordenou á Generalitat a contratar a case 1.900 profesores, en virtude dun acordo que non se estaba executando de maneira correcta. Este caso derivou mesmo nunha petición de "responsabilidades penais". Sobre horizontes temporais, as organizacións consideran que tardará "uns meses ata que haxa unha vista", polo que descartan que a sentenza chegue antes do inicio do curso en setembro. Iso si, Montero (UGT) sinala á Consellería que "iso non quere dicir que teña que esperar" ao fallo xudicial, senón que podería cambiar a súa interpretación se quixese.

Ademais, as organizacións volveron solicitar unha reunión co presidente da Xunta, que tamén estampou a súa rúbrica no documento. Díaz (ANPE) criticou que, cando se asinou en outubro de 2023, Rueda mostrou "disposición total", que "ata tivo tempo de tomar un café" con eles, porque faltaban meses para as seguintes eleccións autonómicas. Así, pediulle que "deixe un pouco a bicicleta" e lles atenda. Así as cousas, os tres sindicatos insistiron en defender o contido do acordo e reclamaron ao resto --entre eles a CIG, o maioritario-- que "se somen" a eles, a pesar dos "insultos e descualificacións" que sufriron no seu momento, en palabras de Campos. "As organizacións que non asinaron dinnos que retiremos a firma, por unha banda, coa boca pequena; e, por outra, esixen á administración que o cumpra", reprochou Díaz.

AGARDAN QUE A "NEUTRALIDADE IDEOLÓXICA" NON PRETENDA "CENSURAR"

Por outra banda, os sindicatos agardan que as instrucións emitidas pola Xunta para o próximo curso, que recolle unha polémica disposición para garantir a "neutralidade ideolóxica" nos centros, non teñan o propósito de "censurar" as actividades desenvolvidas pola comunidade educativa. A preguntas dos medios nunha rolda de prensa ofrecida este martes, o responsable de CCOO-Ensino, Borja Campos, lembrou que esta neutralidade "xa está recollida na lexislación", polo que "non entenden por que" as instrucións teñen que lembrar esta normativa.

"A non ser que sexa impor algunha forma de censura nos centros, que esperemos que non sexa esa a intención de incluír ese apartado innecesario", sinalou. Ademais, Campos lembrou que a lei educativa actualmente en vigor (Lomloe) recolle que "hai que fomentar o pensamento crítico e cidadáns tolerantes" dentro dos colexios e institutos. Nesta mesma liña, a responsable de UGT-Ensino, Sandra Montero, coincidiu en que "non tiña cabida esta mención" nas instrucións, á vez que advertiu que "a aula é intercultural e está para aprender de todo e desenvolver o pensamento crítico".

En similares termos, aínda que con algún matiz, pronunciouse o presidente de ANPE Galicia, Xullo Díaz. Considera que a forma na que se aprobaron as instrucións "non é moi limpa", pero si coincide na esixencia de "neutralidade" nos centros. Ao seu xuízo, "moitos conflitos" que se dan nos colexios é "porque se politizan". Díaz defendeu a liberdade de cátedra e de opinión, pero rexeita facer dos centros "un pimpampum político".