A CIG denunica a "grave" situación da unidade de agudos de psiquiatría do Gil Casares
A falta de información e planificación, o peche de camas, as condicións dos traballadores e o deplorable estado do hospital entre os motivos da denuncia.
Por Europa Press / Redacción | Santiago de Compostela | 04/07/2023 | Actualizada ás 13:13
A CIG-Saúde denunciou falta de información aos traballadores e planificación por parte da Xerencia da área sanitaria de Santiago e do Barbaza sobre as obras nos distintos servizos, os peches de camas ou de centros de saúde.
Nun comunicado remitido aos medios, o sindicato sinala que o pasado 26 de maio remitiu un escrito no que solicitaba diversa información ante a "gravidade" da situación na unidade de hospitalización de agudos de psiquiatría do Gil Casares debido ao desprendemento do teito e ás deficiencias estruturais do inmoble. Entre outros documentos, solicitou o proxecto de reforma do tellado, a planificación e reorganización dos profesionais e dos usuarios e unha análise de como as obras repercutían nos pacientes pendentes de ingreso. Así mesmo, esixiu un informe técnico estrutural do edificio e das distintas instalacións que garantise a seguridade para os profesionais e os pacientes.
Con todo, denuncia que, a día de hoxe, segue sen haber resposta e das 21 camas coas que conta o hospital nesta unidade só están operativas 15. "A dirección da área sanitaria é incapaz de informarnos da planificación e de xestionar de forma adecuada a unidade de psiquiatría", advertiu a CIG-Saúde, que sinala que esta falta de previsión "afecta directamente as persoas usuarias que pasan días no servizo de urxencias e non poden ser ingresadas no servizo de psiquiatría de agudos ao non existir camas dispoñibles".
O sindicato denuncia que non se garanta unha alta calidade neste servizo ao non contar coas camas suficientes e ter unhas instalacións deterioradas e en mal estado, con "condicións impropias dun hospital concibido para aloxar as 24 horas do día aos pacientes ingresados", así como para que "os profesionais poidan realizar a súa actividade con confort e seguridade".
Ademais, a central nacionalista sostén que, máis aló da falta de información, non se conta coa participación do persoal na planificación e ordenación dos recursos humanos da unidade, repercutindo a situación no dereito a conciliar a vida familiar e laboral dos traballadores. "Non se respectan descansos, libranzas e permisos, ao obrigarlle a dirección aos traballadores a facer autocoberturas de noites, festivos, etc.", sinala o sindicato. "É obvio que a Xerencia incumpre a lexislación ao vulnerar os dereitos de información, audiencia e consulta da representación dos traballadores nos termos que legalmente están establecidos", conclúe.
