Os sindicatos CXT e CIG concéntranse en apoio dos traballadores do metal de Pontevedra

As seccións sindicais da CXT e da CIG en Navantia Ferrol convocaron esta mañá unha concentración na porta principal do estaleiro ferrolán en solidariedade cos traballadores do sector do metal pontevedrés que están en folga para esixir melloras no convenio provincial. Finalmente, todo o comité de empresa sumouse á mobilización.

Un dos delegados da CXT, Javier Losada, explicou que o motivo deste acto é que "entendemos que as loitas que se están producindo no metal de Pontevedra non son tan diferentes ás que temos os traballadores en xeral e, en particular, os do estaleiro de Ferrol". En concreto, puxo como exemplo de coincidencia "a garantía de poder adquisitivo sobre a base dos incrementos do IPC, como mínimo". "Hai que lembrar", engadiu, "que os traballadores de Navantia desde o ano 2011 perdemos aproximadamente o 14% do noso poder adquisitivo".

O dereito de subrogación é outro dos nexos de unión, segundo Javier Losada, que lembrou que o convenio do metal da Coruña conquistouno en fai cinco anos. "Esa conquista contribúe a mellorar as condicións nun sector que está totalmente precarizado como o da industria auxiliar", apuntou.

"Para nós", sinalou Losada, "é fundamental poder solidarizarnos coa loita que está a ser tan emblemática e que están a levar adiante os compañeiros de Pontevedra". Ademais, o delegado da CXT denunciou as "brutais e inxustificadas represalias" por parte da Policía dun Goberno "que di ser o máis progresista da Historia". "Non podemos manternos neutrais", subliñou, "porque esa loita é, ao final, a loita de todos".

O BAC. ?Patiño? á súa chegada ao peirao nº10 do Estaleiro de Navantia con motivo do seu regreso do despregamento na Agrupación Naval Permanente da OTAN núm. 2, a 26 de xuño de 2023, en Ferrol, A Coruña, Galicia (España). O Buque de Aprovisionamento. Raúl Lomba - Europa Press