Miñones pide "pensar ben" o voto: "Se colle a papeleta do PP está a escoller de vicepresidente a Abascal"
Reivindica os "avances" desta lexislatura e a Pedro Sánchez como "o presidente máis galego da historia".
Por Europa Press / Redacción | A CORUÑA | 08/07/2023 | Actualizada ás 13:12
O ministro de Sanidade e cabeza de lista do PSOE pola provincia da Coruña, José Miñones, instou este sábado á cidadanía a "pensar ben" o voto que depositarán nas urnas o próximo 23 de xullo e advertiu: "Se colle a papeleta do PP está a coller tamén a papeleta de Vox e está a escoller de vicepresidente a Abascal".
Nun acto de campaña no municipio coruñés de Betanzos, Miñones insistiu en que "cando se colla a papeleta" do PP débese saber que "dereitos que se crían garantidos, xa non o están". "Retrocederanse 40 ou 60 anos", augurou.
En fronte, destacou, a papeleta do PSOE que "garante avance". Por iso, Miñones afirmou que se trata dunha campaña "moi importante", xa que se xogan "dúas formas distintas de afrontar o futuro".
Ademais, falou tamén dos investimentos do Goberno central en Galicia e, en concreto, na provincia da Coruña, e puxo como exemplo o dragado da ría do Burgo ou o Parque do Pasatempo, en Betanzos. Tras isto, afirmou que Pedro Sánchez é "o presidente máis galego de toda a historia". "Por encima de ser ou non de Galicia, senón polo compromiso que ten por esta terra", resumiu.
Tamén pediu aos pensionistas que "o pensen ben o 23 de xullo", do mesmo xeito que aos mozos aos que o Goberno, asegurou, axudou coa bonificación do transporte ou co sistema de bolsas.
"PACTOS DA VERGOÑA"
Así mesmo, José Miñones criticou os "pactos da vergoña" de PP e Vox e, neste senso, manifestou que "durante moito tempo" os populares "ocultaron que querían facer" e tamén "ocultan algo tan básico como canto gana" Feijóo.
"Ocultáronnos todo, pero caeu a careta. Agora temos referentes do que queren para España. Eses pactos lévannos a perder dereitos das mulleres, dereitos LGTBI, dereitos dos traballadores, dos pensionistas. Moitos votantes do PP avergóñanse e a eles pedímoslles o voto para frear esta dereita extrema e á ultradereita. Só hai un partido que pode facelo: o PSOE", reivindicou.
Ante isto, expuxo que os socialistas queren "rebaixar as listas de espera", que os mozos "non só teñan as bonificacións de transporte polas consecuencias da crise", así como apostar por "loitar contra o cambio climático".
En contraposición, engadiu, sitúase o PP cos "seus socios negacionistas, que negan a violencia machista, o cambio climático, os antivacunas, os antiabortistas". Por iso, volveu a insistir en que o 23 de xullo cando se colla a papeleta popular hai que "pensalo ben".
