Piden cinco e seis anos de prisión para dous homes por senllos delitos de abusos sexuais a menores de idade en Ourense
Ambos serán xulgados a próxima semana na Audiencia Provincial de Ourense.
Por Europa Press / Redacción | OURENSE | 08/07/2023 | Actualizada ás 16:14
A Fiscalía pide cinco e seis anos de prisión para dous homes por senllos delitos continuados de abuso sexual a menores de idade. Ambos serán xulgados a próxima semana na Audiencia Provincial de Ourense.
O martes día 11, a Sección Segunda da Audiencia Provincial xulga a un home para o que a Fiscalía pide cinco anos e seis meses por un delito continuado de abuso sexual.
Ademais, o Ministerio Público solicita para o acusado a prohibición de achegarse á vítima, ao seu domicilio e centro escolar, a menos de 100 metros, e de comunicarse con ela durante o tempo da condena.Tamén deberá indemnizala en 6.000 euros polos danos morais causados.
Os feitos tiveron lugar no domicilio familiar do acusado, en Ourense, onde a vítima acudía con regularidade levada pola súa nai. O acusado aproveita a súa relación de parentesco coa menor para levar a cabo o delito, feitos que se repiten en reiteradas ocasións en datas indeterminadas, pero en todo caso desde 2017.
Pola súa banda, o xoves tamén xulgará a un home para o que a Fiscalía pide seis anos de prisión, acusado dun delito continuado de abuso sexual a menor de idade, así como a prohibición de achegarse á vítima, ao seu domicilio ou lugar que frecuente, a menos de 200 metros, e de comunicarse con ela durante dous anos.
O Ministerio Fiscal pide a súa inhabilitación para calquera profesión ou oficio, sexa ou non retribuído, que leve contacto regular e directo con menores de idade por un tempo superior en catro anos á pena privativa de liberdade imposta. Deberá indemnizala en 5.000 euros polos danos morais causados.
Os feitos suceden no domicilio familiar no que conviven ambos, en Ourense. O acusado aproveitou a súa relación de parentesco coa menor para levar a cabo o delito, feitos que se realizan entre 2017 e 2018.
