Os galegos perden un 5,3% de poder adquisitivo aínda que aumentou o salario medio en 2022
O salario medio galego sobe un 3,2% en 2022, ata 1.672 euros.
Por Europa Press / Redacción | SANTIAGO DE COMPOSTELA | 20/07/2023 | Actualizada ás 10:28
O salario medio galego subiu un 3,2% en 2022 en relación ao ano anterior, ata situarse en 1.672 euros. Con todo, perdeu poder adquisitivo, en concreto un 5,3%, pola inflación, segundo un estudo de Adecco.
En comparación coa media de España, de 1.822 euros, o salario medio de Galicia é un 8,2% máis baixo e ocupa o noveno posto do ranking por comunidades autónomas. A subida do 3,2% con respecto ao ano anterior equivale a unha ganancia de 628 euros ao ano e é inferior á do conxunto de España, do 4% con respecto a 2021.
En cambio, se se analiza o período 2017-2022 obtense outro resultado: o salario medio galego é o que máis creceu (+13,6%), fronte ao +11,2% da media española. Se se desconta a variación dos prezos ao consumo, en 2022, de media, o incremento do IPC en Galicia foi do 9% con respecto ao ano anterior. Esta subida supuxo unha perda dun 5,3% no poder adquisitivo do salario galego, que se traduce en 1.031 euros menos ao ano. Esta perda é maior que a do conxunto de España (-4%).
No período 2017-2022 o poder de compra do salario galego caeu un 1,2% (-2,5% nacional), a segunda caída máis leve entre todas as autonomías.
CONSTRUCIÓN, SERVIZOS E INDUSTRIA
Por sectores, en 2022 subiu o salario medio para o tres sectores principais en Galicia: a construción presenta o maior incremento cun +3,7%, seguido de servizos cun +3,3% e a industria cun +3,1%.
A pesar destas cifras, os tres sectores exhibiron unha retribución media inferior á respectiva media sectorial do conxunto de España. A maior diferenza é para servizos (1.622 euros), que é un 9,4% inferior á media do sector (1.790 euros). Esta diferenza supón 168 euros menos ao mes ou 2.013 euros menos ao ano na rexión.
Ao analizar a remuneración media dos distintos sectores da economía en base ao seu poder de compra real entre 2017 e 2022, o salario medio na industria galega perdeu un 2,8% en termos reais (xa que o seu aumento foi inferior ao crecemento dos prezos ao consumo). É unha perda do poder de compra 3,4 puntos porcentuais por baixo da deterioración do salario medio industrial do conxunto de España, que perdeu un 6,3%.
En cambio, a construción gaña un 2,6% de poder adquisitivo, que contrasta coa perda nacional do sector (-4,4%). Por último, servizos perde un 1%, tamén por baixo da media do sector que cae un 1,4%.
