Titiriberia levará máis dunha vintena de funcións de monicreques a Rianxo entre este luns e o 30 de xullo
Haberá un total de 17 compañías de Galicia, Cataluña, País Vasco, Brasil e Portugal.
Por Europa Press / Redacción | SANTIAGO DE COMPOSTELA | 23/07/2023 | Actualizada ás 16:34
A oitava edición do festival dos monicreques tradicionais Titiriberia levará ao municipio de Rianxo máis dunha vintena de funcións entre este luns, día 24, e o 30 de xullo. Haberá un total de 17 compañías de Galicia, Cataluña, País Vasco, Brasil e Portugal.
Este festival está organizado pola asociación Morreu o Demo, co apoio do Concello de Rianxo, a Xunta e a Deputación da Coruña.
"Rianxo volve ser, un verán máis, fogar para o teatro de monicreques", asegurou a presidenta da asociación Morreu o Demo, Comba Campoi, na presentación desta nova edición.
Titiriberia estreará cinco producións este ano: 'O xigante Barriga Verde', de Títeres Alakrán; 'Coa música a outra parte', de Trécola; 'O Cego dos monifates. Romance de Peito de Lobo', de Seisdedos; así como as dúas producións propias do festival, os pasacalles 'A festa dos monicreques' e unha nova edición de 'As Varietés de Barriga Verde'.
Esta edición conmemora os 90 anos do histórico Teatro Airiños. Ademais, descentralízase o seu programa con representacións, conferencias e talleres por diferentes parroquias e escenarios do municipio.
