Un laboratorio da USC estudará as defensas naturais das aciñeiras para paliar patoloxías forestais e fabricar pensos
O Laboratorio de Investigación e Desenvolvemento de Solucións Analíticas da Facultade de Química da USC investigará os residuos de aciñeiras autóctonas da aldea modelo de Moreda, en Folgoso do Courel, como materia prima para a obtención de extractos ricos en compostos bioactivos que poidan funcionar como terapia antifúnxica en patoloxía forestal e aditivo alimentario en pensos.
Por Europa Press / Redacción | SANTIAGO DE COMPOSTELA | 24/07/2023 | Actualizada ás 17:36
O Laboratorio de Investigación e Desenvolvemento de Solucións Analíticas (Lidsa) da Facultade de Química da USC investigará os residuos de aciñeiras autóctonas da aldea modelo de Moreda, en Folgoso do Courel, como materia prima para a obtención de extractos ricos en compostos bioactivos que poidan funcionar como terapia antifúnxica en patoloxía forestal e aditivo alimentario en pensos.
O proxecto baséase na utilización dun terreo de aciñeiras "antigas e de gran valor" do que pretenden obterse "extractos vexetais a partir de residuos agroforestais e froitos", tal e como explica a profesora da USC Marta Lores.
As aciñeiras fabrican "defensas naturais" contra os inimigos que as ameazan, uns compostos bioactivos que constitúen "un auténtico arsenal fitoquímico" de defensa ao que agora se pretende dar uso como ingrediente funcional en diversos produtos.
Neste sentido, os achados do proxecto poderían servir como tratamento antifúnxico para as propias aciñeiras, dentro e fóra de Galicia, así como para outras especies de árbores. De feito, poderían ser clave para paliar a seca das aciñeiras que producen as landras das que se alimenta o porco ibérico en territorios como Estremadura. Ademais, outra das saídas potenciais destes compostos bioactivos atópase no seu uso como aditivo para enriquecer pensos.
