O BNG carga contra o sistema de financiamento e acusa ao PP de "servilismo" e de ter "un discurso aquí e outro en Madrid"

O deputado do BNG Luís Bará esixiu este luns a Alfonso Rueda que exerza como presidente da Xunta e non como "delegado do PP" para defender os intereses de Galicia no debate aberto sobre o financiamento autonómico, á vez que o acusou a el e á súa formación de "servilismo" e de ter "un dobre discurso: un aquí e outro en Madrid".

"Asistimos a unha auténtica sobreactuación de Rueda, que fala para a galería, mesmo con bágoas de crocodilo e cun enfoque electoralista", dixo Bará, apuntando que durante os últimos anos Rueda e Núñez Feijóo "mantiveron silencio respecto do actual modelo de financiamento", que é "obsoleto" e "prexudicial para Galicia".

Bará afirmou que a posición da Xunta foi "de submisión cando goberna o PP e de confrontación cando goberna o Partido Socialista" e acusou aos populares galegos de "dobre discurso" con respecto a esta cuestión. "Cando chegan a Castelá éntralles unha especie de tembleque e abrazan o servilismo e a submisión. E non din nin pío, por exemplo, sobre a Comunidade de Madrid, unha das grandes beneficiarias deste sistema discriminatorio para Galicia e que ademais creou un auténtico paraíso fiscal para atraer grandes empresas que deixan de tributar noutros territorios", criticou Bará.

COMISIÓN PARLAMENTARIA

En relación á cuestión do financiamento, no próximo período de sesións, Bará dixo que o BNG pedirá a reactivación da comisión parlamentaria sobre financiamento autonómico, que, "leva case ano e medio en 'stand by' porque ao PP non lle interesa que haxa un acordo". Para unha reforma do sistema, o BNG aposta por un "modelo de concerto semellante ao de Euskadi e Navarra", para que Galicia "teña plena autonomía fiscal e financeira".

Sen renunciar a el, os nacionalistas levan unha "proposta alternativa", un "acordo de mínimos" para "avanzar na soberanía fiscal e financeira" a partir de "unha negociación bilateral do Estado asentada nos alicerces da recadación e da repartición", dixo Luís Bará. No primeiro ámbito, o BNG propón aumentar a recadación mediante a cesión do 90 % do IVE e do IRPF, ou o incremento de xestión doutros impostos especiais. Pide, así mesmo, a cesión do imposto de sociedades para que tributen en Galicia as empresas que desenvolven aquí a súa actividade produtiva e un modelo fiscal "máis xusto e progresivo", así como desenvolver unha fiscalidade ambiental.

A alternativa de mínimos que presenta o Bloque inclúe tamén cambios no criterio de distribución por poboación axustada, mediante o incremento da ponderación do envellecemento do 8,15 % actual ao 15 %, e da dispersión do 0,6 % ao 4,2 %. Outras variables a ter en conta, segundo o BNG, serían a emigración, as características xeográficas e ambientais do territorio (como os quilómetros de costa) ou o feito de ter lingua e cultura propias.

Luís Bará referiuse, por outra banda, ao debate sobre a condonación da débeda do FLA, instando tanto a Rueda como a Feijóo a explicar por que a Xunta non acudiu a este sistema de financiamento público. En todo caso, reclamou compensacións para Galicia "que durante estes anos acudiu ao mercado privado e multiplicou por tres o seu endebedamento".

O PSDEG NON VE QUE EXISTA DEBATE

Sobre o modelo de financiamento autonómico, o deputado socialista Julio Torrado dixo que aínda non existe ningún documento sobre o que debater e agradeceu ao PP que "saia agora a dicir" que o actual modelo "é bo". "O PP falou pestes do modelo actual, que aprobou o goberno Zapatero e negociou en Galicia o goberno de Touriño", dixo Torrado, que se mostrou sorprendido porque "agora o PP tente defendelo". Para os socialistas, este sistema posibilitou "moitos avances" en Galicia e pediu a quen tente debater un novo, cando "exista debate", que "primeiro demostre estar en condicións de defender ben aos galegos".

O deputado do BNG Luís Bará, en rolda de prensa | Fonte: BNG