Consellos moi importantes da OCU para afrontar a vaga de calor

Hidratarse, atender a grupos de risco ou consumir pratos lixeiros son algúns dos consellos que ofrece a Organización de Consumidores e Usuarios (OCU) con motivo da terceira onda de calor que está a sufrir o país, con temperaturas diúrnas que alcanzarán os 38º e 40º en boa parte da Península.

Por iso, entre outros consellos, recomenda a anciáns, nenos e enfermos crónicos non saír á rúa durante as horas de máxima calor, é dicir, entre as 12.00 e as 17.00 horas naquelas zonas onde se superen os 35 graos (ºC).

Así mesmo, suxire levar unha gorra ou un chapeu no exterior ou buscar as sombras así como hidratarse de forma regular; optar por unha alimentación lixeira, priorizando a froita e as sopas frías, como o gazpacho; ou evitar as bebidas alcohólicas, xa que favorecen a deshidratación.

Ademais, aconsella baixar as persianas en casa en canto o sol pegue de pleno; pór o ventilador ou o aire acondicionado a calquera hora; e deixar a comida e os medicamentos nun lugar fresco e seco. Tamén avoga por conectar o aire acondicionado no coche ou baixar os portelos e non deixar a ninguén esperando dentro coas portas pechadas (mascotas incluídas).

Por último, en caso de malestar, pel avermellada, pulso acelerado, febre, confusión ou mareos, pide chamar ao 112 ou dirixirse a un centro de urxencias.

Sol e calor, o que buscan moitos galegos nas vacacións de verán | Fonte: EP