O Concello de Frades recibiu máis de 460.000 euros da Xunta para mellorar as súas infraestruturas rurais

O conselleiro do Medio Rural, José González, mantivo unha reunión co alcalde do concello de Frades, Roberto Rey, para coñecer de primeira man as necesidades e demandas relativas ao campo deste municipio coruñés, onde, segundo trasladou a Xunta, destináronse máis de 460.000 euros para a mellora de infraestruturas rurais desde o ano 2016.

Esta achega realizouse a través do Plan Marco de mellora de camiños rurais, que ten como obxectivo a cohesión territorial e social dos núcleos rurais, "mellorando desta forma a calidade de vida e traballo no medio rural, así como a accesibilidade e a vertebración do territorio". Precisamente, destacou, na convocatoria deste ano 2023-2024 foille concedida unha achega de case 62.400 euros para o arranxo do camiño que une Tañoi coa Cruz do Canedo (Abellá), entre outros.

Neste sentido, José González indicou que nos últimos oito anos, concedéronse axudas a través deste Plan para actuar sobre máis de 5.450 camiños, conseguindo unha lonxitude de máis de 4.280 quilómetros de vías rurais melloradas en toda Galicia, por importe de máis de 130 millóns de euros. Así mesmo, a Consellería puxo en valor que o concello de Frades ten finalizadas un total de 19 concentracións parcelarias, as cales permitiron reorganizar unha superficie de algo máis de 7.700 hectáreas.

O conselleiro do Medio Rural, José González, mantén unha reunión co alcalde de Frades | Fonte: XUNTA