O Goberno encargarase de financiar proxectos para conexión a internet en zonas rurais e remotas
O diñeiro destinado ascende aos 19,7 millóns de euros.
Por E.P. | Santiago de Compostela | 09/08/2023 | Actualizada ás 12:50
O delegado do Goberno en Galicia, Pedro Blanco, cifrou en 19,7 millóns o diñeiro que o Executivo central destinará na comunidade autónoma galega a financiar proxectos de conexión a internet mediante fibra óptica en zonas rurais e remotas.
Nun comunicado, destaca as actuacións desde o Executivo central "para completar a conectividade dixital ultrarrápida do territorio galego coa terceira convocatoria do programa UNICO-Banda Ancha, que levará a conexión a internet mediante fibra óptica a 9.429 familias e empresas de zonas rurais e remotas da comunidade".
Esta liña, que foi publicada xa no Boletín Oficial do Estado (BOE), reserva para Galicia un total de 19,7 millóns de euros "que se destinarán a financiar os proxectos de conexión necesarios para conseguir o obxectivo de conectividade proposto", explica a Delegación do Goberno.
