Esclarecido un incendio forestal en San Cibrao das Viñas provocado por traballos de roza
Por E.P. | SANTIAGO DE COMPOSTELA | 25/08/2023 | Actualizada ás 11:00
Axentes do Grupo de Investigación de Incendios da Policía Autonómica en Ourense esclareceron as causas dun incendio forestal rexistrado o pasado martes, 22 de agosto, no municipio ourensán de San Cibrao das Viñas.
O lume, lembran nun comunicado, afectou a 0,41 hectáreas de superficie rasa. Relatan que a investigación puxo de manifesto, tras a inspección ocular da superficie afectada, que o incendio foi provocado durante os traballos de roza, sen as debidas medidas de seguridade necesarias á hora de realizala nesta época do ano.
Na extinción do lume participaron un axente, cinco brigadas, dúas motobombas e un helicóptero. A Policía Autonómica remitiu as dilixencias por estes feitos ao Xulgado de Instrución en funcións de garda de Ourense. No que vai de ano, leva investigadas 19 persoas como presuntas autoras de incendios forestais.
