A firma de hipotecas sobre vivendas baixa un 17,3 % en xuño en Galicia

O número de hipotecas constituídas sobre vivendas en xuño en Galicia situouse en 1.112, un 17,3 por cento menos respecto ao mesmo mes de 2022 e un 17,5 por cento máis se se compara co mes anterior, segundo datos difundidos este xoves polo Instituto Nacional de Estatística (INE).

A nivel estatal, baixou un 21,9 % o pasado mes de xuño respecto ao mesmo mes de 2022, ata sumar 33.478 préstamos, a cifra máis baixa nun mes de xuño desde 2020, en plena pandemia. Na comunidade autónoma galega, o capital prestado ascende 119 millóns de euros, un 18,9 % menos en taxa interanual e un 12,9 % máis en comparación co mes de maio.

Por outra banda, o tipo de interese medio das hipotecas sobre vivenda seguiu á alza no sexto mes do ano, alcanzando o 3,19 %, o seu valor máis alto desde abril de 2017, cando se situou no 3,20 por cento. Co descenso interanual de xuño, a firma de hipotecas sobre vivendas encadea, a nivel estatal, cinco meses de taxas negativas, aínda que a de xuño moderouse en case dous puntos respecto da rexistrada en maio (- 24 %).

O importe medio das hipotecas constituídas sobre vivendas baixou un 0,7 % interanual no sexto mes do ano, ata os 143.796 euros, mentres que o capital prestado diminuíu un 22,5 %, ata os 4.814 millóns de euros.

Por comunidades autónomas, as que rexistraron un maior número de hipotecas constituídas sobre vivendas en xuño foron Andalucía (7.043), Madrid (5.675) e Cataluña (5.336). Así mesmo, as rexións nas que se prestou máis capital para a constitución de hipotecas sobre vivendas foron Madrid (1.218,2 millóns de euros), Andalucía (883,4 millóns) e Cataluña (858,4 millóns).

Un edificio de vivendas en construción, a 9 de maio de 2023, en Ourense | Fonte: Agostime