Pili Pampín cara a cara con Ana Pontón en #CódigoAna
É a primeira convidada do programa de entrevistas da líder do Bloque.
Por Europa Press / Redacción | SANTIAGO DE COMPOSTELA | 15/09/2023 | Actualizada ás 18:33
A portavoz nacional do BNG, Ana Pontón, estrea o seu espazo de entrevistas e conversación con referentes de diferentes ámbitos da sociedade galega, #CódigoAna, coa artista Pili Pampín como protagonista.
Así, o programa arrinca cunha entrevista a esta artista intergeneracional, unha auténtica diva da música popular galega e que, ao mesmo tempo, arrasta a ente novo a través das súas colaboracións con músicos novos como Ortiga, formando un tándem musical que se converteu un "imprescindible" en salas de festas e festivais.
Precisamente, no adianto deste programa, Pili Pampín asegura que un dos maiores "subidones" que tivo na escena foi a súa participación con Ortiga na Sala Capitol, unha aparición que se produciu ao final do concerto e que foi reclamada con aclamacións polo público asistente.
#CódigoAna é un espazo no que se tratan temas que interesan e preocupan á cidadanía a través dos protagonistas que, nunha cara a cara con Ana Pontón, contan a súa propia experiencia vital e profesional, coa que se poden sentir identificadas ou interpeladas outras persoas.
PILI PAMPÍN
Nada en Ribasar (Rois) en 1971, está considerada como o gran referente actual da música popular, herdeira de Ana Kiro e Pucho Boedo, cos que tamén foi vocalista de grandes orquestras galegas e protagonista indiscutible da música de verbena, formato no que leva anos triunfando entre a xente nova, novas xeracións que reconectaron cunha das expresións máis xenuínas da música galega.
