Por E.P. | SANTIAGO DE COMPOSTELA | 24/09/2023 | Actualizada ás 13:35
O prazo para matricularse nos graos medios do Centro de Formación e Experimentación Agroforestal Pedro Murias, no concello lucense de Ribadeo, continúa aberto. Segundo informou a Xunta, o centro oferta os ciclos de Aproveitamento e Conservación do Medio Natural e de Produción Agroecolóxica.
O primeiro céntrase en cuestións silvícolas, como as instalacións forestais ou a sanidade vexetal. Ademais, imparten materias relacionadas coa conservación de especies cinexéticas e piscícolas, así como as nocións necesarias sobre control fitosanitario.
Pola súa banda, os estudantes de Produción Agroecolóxica focalizarán os seus estudos en fundamentos agronómicos e zootécnicos, a implantación de cultivos ecolóxicos e en principios de sanidade vexetal.
Ademais, recibirán coñecementos sobre infraestruturas e instalacións agrícolas, así como en produción gandeira e vexetal de forma ecolóxica. Estes ciclos forman parte da modalidade de FP Dual, polo que os estudantes poderán recibir formación teórica no centro educativo e ao mesmo tempo pola en práctica nun centro de traballo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.