A ex conselleira do BNG Táboas di que non lle importaría "axudar desde fóra" a Ana Pontón

A que foi conselleira de Vivenda no bipartito e actual Vicepresidenta da Unión Internacional de Arquitectura, Teresa Táboas, puxo en valor o "liderado consolidado" de Ana Pontón no BNG e dixo esperar que "tire con forza", á vez que recoñeceu que "hai un tempo para estar en cada sitio", aínda que asegurou que non lle importaría axudar "desde fóra".

Nunha entrevista en RNE Galicia, a que foi responsable de Vivenda no bipartito mostrou a súa "honra" por estar naquel goberno no que, apuntou, "fixéronse grandes cousas". Con todo, agora, sinalou que se lle piden axuda "desde fóra", non terá inconveniente en prestala. "Non fai falta estar nos gobernos para botar unha man", expresou.

Así respondeu ante a pregunta de se volvería ao Goberno nun hipotético Executivo liderado por Ana Pontón. Ante isto, recoñeceu que "evidentemente" é nacionalista e espera que "haxa un cambio", pero insistiu que, no seu caso, "hai un tempo para estar en cada sitio".

Nesta liña, destacou a importancia de que a cidadanía teña a "oportunidade" de comprobar que hai "outras maneiras de gobernar" e puxo como exemplo o caso do Concello de Pontevedra, co nacionalista Miguel Anxo Fernández Lores ao mando.

BAIXOS COMO VIVENDAS

Por outra banda, cuestionada sobre a normativa que permite destinar a vivenda os baixos dos inmobles, Táboas defendeu a medida, argumentando que nos urbanismos dos anos 70 "entendíase que ía haber comercio en cada baixo", pero iso "é impensable hoxe en día".

Neste sentido, expuxo que no resto de Europa, "nos baixos hai vivendas". "Ese é un erro que se arrastra desde hai moitos anos", manifestou antes de advertir das dificultades que tería adaptarmoitos baixos debido a "problemas de ventilación ou de iluminación".

Teresa Táboas | Fonte: casademarcelo.es