O paro sobe en 2.918 persoas en Galicia en setembro, cun ritmo de crecemento tres veces maior que o do resto de España

O número de parados rexistrados nas oficinas dos servizos públicos de emprego subiu en Galicia en 2.918 persoas en setembro en relación ao mes anterior (+ 2,28 %), cun total de 130.643 desempregados, segundo datos do Ministerio de Traballo publicados este martes.

Este ritmo de crecemento é tres veces maior que o da media española (+ 0,73 %). Así, Galicia é a terceira comunidade que máis sobe en cifras totais, só por detrás de Andalucía (15.949) e a Comunidade de Madrid (3.358), mentres baixa en seis autonomías. En relación co mesmo mes de 2022, o desemprego baixa en 13.466 persoas na comunidade galega, un 9,34 % menos. Neste caso é maior que a media española de descenso (- 7,46 %).

O paro en España subiu en 19.768 persoas en setembro en relación ao mes anterior (+ 0,7 %) impulsado, sobre todo, polo sector servizos, que concentrou boa parte do incremento do desemprego polo fin da tempada turística. Tanto no caso galego como no español, acumúlanse xa dous meses consecutivos de ascensos no desemprego. Do total de desempregados galegos, 53.343 son homes e 77.300 son mulleres. Entre eles, un total de 5.443 son menores de 25 anos (2.698 homes e 2.745 mulleres).

SUBIDA EN TODAS AS PROVINCIAS E SECTORES

O paro increméntase nas catro provincias galegas, con Pontevedra co ascenso máis acusado (+ 2,85 % e 1.397 persoas). En termos relativos séguelle: Lugo (+ 2,67 % e 326 persoas), Ourense (+ 1,96 % e 293 persoas) e A Coruña (+ 1,75 % e 902 persoas). Na comparativa cun ano antes, o paro baixa de forma xeneralizada nas catro provincias: Pontevedra (- 9,91 % e 5.551 persoas menos), Lugo (- 9,64 % e 1.335 menos), Ourense (- 9,38 % e 1.577 menos) e A Coruña (- 8,71 % e 5.003 menos).

Por sectores, a maior parte dos novos desempregados acumúlanse nos servizos, con 1.993 máis, seguido da industria (303), agricultura (108) e construción (84). Tamén hai 430 máis sen emprego anterior. A distribución total do desemprego galego queda do seguinte modo: 4.126 na agricultura, 13.176 na industria, 8.828 na construción, 92.661 nos servizos e 11.852 no colectivo sen emprego anterior.

Os demandantes de emprego, 194.843, repártense entre 33.986 ocupados, 19.086 que indicaron na súa solicitude condicións especiais de traballo e 141.771 non ocupados. Os non ocupados rexistran un ascenso do 2,45 % en taxa mensual (3.385 máis), aínda que son 14.794 menos que en setembro de 2022 (- 9,45 %). Na comunidade galega en setembro son 10.110 os parados estranxeiros, 643 máis que en agosto (+ 6,79 %) e 63 menos (- 0,62 %) que no mesmo mes do ano anterior. Hai 7.106 extracomunitarios e 3.004 comunitarios.

SOBE A CONTRATACIÓN INDEFINIDA RESPECTO DE AGOSTO

A contratación en setembro en Galicia elevouse a 70.228 firmas, 5.721 máis que o mes anterior (8,87 % máis), pero 10.777 menos que un ano antes (- 13,30 %). Do total de contratos, 22.050 foron indefinidos (31,4 %) e 48.178, temporais (68,6 %). Crecen en 5.960 os contratos indefinidos en taxa mensual (+ 37 %), aínda que diminúen en taxa interanual (6.694 menos, - 23,3 %). Os contratos temporais retroceden tanto en comparativa con agosto (239 menos e - 0,49 %) como fronte a setembro de 2022 (4.083 menos e - 7,81 %). No acumulado do que vai de ano son 553.911 contratos: 182.157 indefinidos (32,89 % do total) e 371.754 temporais (67,11 %).

PRESTACIÓNS

Os beneficiarios de prestacións por desemprego ascenderon a 79.969 en agosto (estes datos sempre se publican cun mes de atraso respecto ao paro), mentres que o gasto alcanzou os 84,1 millóns (3,7 millóns máis que o anterior mes). A contía media media da prestación contributiva percibida por beneficiario foi de 920,6 euros, sete euros máis que o mes anterior.

A XUNTA DEFENDE QUE O PARO "SOBE TODOS OS ANOS" EN SETEMBRO

A conselleira de Promoción do Emprego e Igualdade, Elena Rivo, defende que o paro sobe "todos os anos" en setembro desde 1996 (excepto 2005 e 2020). Non entanto, destaca que o total de desempregados, 130.643, supón a mellor cifra nun mes de setembro na serie histórica, é dicir, desde hai 27 anos, con rexistros desde 1996.

Así, pon o foco sobre a comparativa interanual no canto da mensual, de forma que remarca que Galicia é a quinta comunidade na que máis baixa o paro en termos absolutos e relativos (- 9,34 %), con mellor diferencial que a media española. Valora que respecto de hai un ano baixa en todos os sectores e provincias, coa cifra de parados menores de 30 anos e mulleres máis reducida desde 2005.

En canto ás afiliacións, houbo unha perda de 6.799 cotizantes en comparación co mes pasado, aínda que o Goberno galego subliña a comparativa interanual, cun crecemento do 2 %, o que supón 21.766 persoas máis, con niveis superiores a hai 14 anos. Por todo iso, a conselleira de Promoción do Emprego asevera que "o mercado laboral galego continúa evolucionando de forma favorable" tras os datos do mes de setembro.

SINDICATOS: A XUNTA DEBE "TOMAR NOTA"

Sindicatos chaman á Xunta a "tomar nota" por un aumento do desmpleo en setembro que supón o terceiro maior incremento por comunidades en setembro, de forma que empraza a desenvolver políticas sectoriais máis aló do turismo e o Xacobeo.

UGT demanda que "é hora de acabar cos problemas do mercado de traballo", entre o que apunta a unha "elevada" temporalidade, do mesmo xeito que desemprego de longa duración. No entanto, valora que a reforma laboral favoreceu o impulso ao emprego indefinido.

Pola súa banda, CCOO esixe á Xunta "non fialo todo ao turismo e ao Xacobeo" e pide apostar por emprego de calidade, á vez que advirte que o aumento de setembro é superior ao mesmo mes en anos pasados. A secretaria de Emprego de CC.OO. Galicia, Maica Bouza, insta o presidente da Xunta, Alfonso Rueda, a asumir a súa obrigación de "gobernar ao servizo de Galicia e non do PP estatal". 

A CIG considera que o aumento do paro, a caída da afiliación e a eventualidade "confirman o fracaso da reforma laboral", así como "un modelo económico baseado no turismo". O secretario confederal da CIG, Franscisco González Sío, censura que "vemos como o sector servizos, e neste caso a hostalaría e o persoal de contratos eventuais, perden o seu posto de traballo cando finaliza o período estival", reproba.