O Parlamento reclama un protocolo homoxéneo para as cesáreas acompañadas e 'pel con pel'

A Comisión de Sanidade do Parlamento de Galicia aprobou, co voto unánime dos tres grupos, unha proposición non de lei na que instan á Xunta a elaborar unha guía que "homoxeneice" en todas as áreas sanitarias o protocolo de atención aos nacementos por cesárea.

Concretamente, e despois dos primeiros partos deste tipo xa postos en marcha, a Cámara reclama na proposición (que parte dunha iniciativa do PP) que todas as áreas teñan un protocolo común que permita o acompañamento no parto da persoa que a nai decida, así como que se posibilite o contacto 'pel con pel' continuado co recentemente nado.

Nesta mesma comisión, tamén se aprobou co consenso dos tres grupos unha proposta do PSdeG na que se insta á Xunta a realizar "un estudo sobre a posible medida de incorporar progresivamente e sistematicamente a figura do óptico e optometrista" no Sergas, así como ter en conta as avaliacións sobre o tema realizadas polos colectivos implicados que permitan planificar un calendario temporal da estratexia.

Alba e Fabio, unha parella de Santa Comba tras o nacemento da súa filla, Aylen, no primeiro parto por cesárea no Hospital Clínico de Santiago de Compostela no que a nai puido estar acompañada | Fonte: CHUS

Así mesmo, a iniciativa pide abrir unha mesa de diálogo co Colexio Oficial de Ópticos e Optometristas para avaliar posibles modificacións na proposta de convenio para volver integrar a unha maioría dos establecementos.