Rematado o acceso ao parque empresarial de Beariz desde a OU-212
Actuouse ao longo duns 250 metros na estrada OU-212 pola marxe esquerda da vía, executando unha intersección que permite todos os movementos, especialmente os de vehículos pesados.
Por Europa Press / Redacción | OURENSE | 09/10/2023 | Actualizada ás 12:47
A Consellería de Infraestruturas e Mobilidade da Xunta concluíu as obras para dotar de acceso ao parque empresarial de Beariz desde a estrada OU-212, nas que se investiron 445.000 euros. A actuación é resultado dun estudo, no que se analizaron seis posibles alternativas, tendo en conto a xeometría da estrada, a funcionalidade e a seguridade viaria. A solución concreta está recollida no Plan Especial de Creación de Chan Industrial do Concello de Beariz, e desenvolveuse segundo o previsto no informe de sustentabilidade do devandito plan.
Así, actuouse ao longo duns 250 metros na estrada OU-212 pola marxe esquerda da vía, executando unha intersección que permite todos os movementos, especialmente os de vehículos pesados. Tamén se habilitaron cuñas de aceleración e desaceleración de 30 metros de lonxitude para facilitar a incorporación á vía e a saída cara ao polígono en condicións de seguridade.
O trazado onde se realizou a nova conexión conta cunha recta de 400 metros, onde hai unha estrutura, no seu punto medio, que permite o paso sobre un regacho. Así mesmo, instaláronse canalizacións de servizos baixo a berma que serve de protección contra os desprendementos, en previsión de dar continuidade no futuro ao sistema de iluminación do parque empresarial.
