Convocadas novas manifestacións en apoio ao pobo palestino en distintas cidades e vilas galegas
Convócanse concentracións para o domingo 22 de outubro ás 12 horas nas principais cidades e outras vilas do país para condenar os crimes contra a humanidade en Gaza.
Por Galicia Confidencial | Santiago de Compostela | 19/10/2023 | Actualizada ás 13:33
A asociación Galiza por Palestina pide a fin dos bombardeos israelís na Franxa de Gaza. Nun comunicado, asegura que a sociedade galega asiste con "alarma e indignación aos crimes contra a humanidade en Gaza" mentres aumentan a ocupación e ataques á poboación na Cisxordania.
Ante estes acontecementos, esta e outras asociacións convocan manifestacións e concentracións por toda a eografía galega o domingo 22 de outubro ás 12 horas en distintas vilas e cidades como A Coruña, Betanzos, Burela, Santiago de Compostela, Ferrol, Lugo, Monforte, Ourense, Pontevedra, Vigo, Ribeira e Vilagarcía.
O chamamento faise dende as asociacións e solidariedade con Palestina na Galiza Asociación Galaico Árabe Jenin, BDS Galiza, Mar de Lumes e Galiza por Palestina. Estes colectivos condenan "máis dunha vez e con rotunidade o xenocidio que está a levar a cabo o estado sionista de Israel contra o pobo palestino coa atroz complicidade da comunidade internacional e da OTAN".
Dende Galicia por Palestina insisten en que non se pode "permitir que o pobo palestino continúe sendo borrado do mapa mentres vemos como o fan en directo" e que este xenocidio ten que parar xa.
