Cando o patrimonio e o medio ambiente son máis importantes que os intereses eólicos

Un total de oitenta personalidades de distintos ámbitos da cultura, do activismo ambiental, da ciencia ou dos movementos sociais subscribiron un escrito contra o megaproxecto eólico que se pretende construír en Moraña. "Monte Acibal: Manifesto Contra ou Espolio dos Nosos Montes e Os Seus Bens" presentouse esta fin de semana na Casa da Cultura de Amil, en Moraña. Impulsado polo colectivo Amil Sen Eólicos e o Colectivo pola Defensa do Patrimonio A Forneiriña é froito de varios meses de traballo.

Está asinado, entre outros, por Agustín Azkarate Garai-Olann, director Cátedra UNESCO de Paisaxes Culturais e Patrimonio; Antonio de la PeñaSantos, arqueólogo, membro do Instituto de Estudos Galegos e do Centro de Estudos Históricos de Pontevedra, e académico da Real Academia Catalá de Belas Artes; Dario Seglie, profesor, doutor e director xeral do CeSMAP-Study Centre and Prehistoric Art Museum Polytechnic of Torino; Joaquín Araújo, agricultor, escritor e activista ecolóxico; Manuel Rivas, escritor, guionista e xornalista; Manuel Santos Estévez, arqueólogo especialista en arte rupestre; Mónica Fernandez-Aceytuno, bióloga e defensora do Monte do Gato...

 

O contido deste texto chama á acción, reclamando o deber lexítimo das entidades públicas de defender o patrimonio histórico e natural por enriba dos intereses empresariais. Os colectivos detrás do manifesto instan á revisión dos proxectos de macroeólicas en zonas arqueolóxicas, a mellora dos instrumentos de avaliación ambiental e a re-planificación do modelo de desenvolvemento económico de Galicia.

 

NECESIDADE DE PRESERVAR O AMBIENTE

 

Unha parte esencial do alegato é o compromiso coa soberanía dos concellos que rexeitan a instalación de macroeólicos nas súas áreas e a necesidade de preservar e poñer en valor o rico patrimonio cultural e natural de Galicia. Tamén se subliña a importancia de conservar os espazos naturais para garantir a súa biodiversidade.

 

Por iso, os asinantes agardan que o Manifesto Acibal sexa un chamamento a protexer os montes galegos e a súa rica herencia cultural e natural para as xeracións futuras, promovendo unha visión de desenvolvemento sustentable que respecte a historia e a natureza da nosa terra.

 

Este manifesto presentase a mesma semana que unha sentencia do TSX suspendeu cautelarmente as obras no Acibal. Os veciños lamentan que esta medida non teña chegado antes, pero celébrana e vena como unha oportunidade para que de unha vez se avalíen os danos reais no Acibal e a non viavilidade dun Polígono Eólico no medio de un xacemento arqueolóxico e atravesando unha zona de humidal.